هۆكاری نەچونی شاندی هەرێم بۆ بەغدا ئاشكرا دەكرێت

پۆڵەتیك پرێس

بەپێی ئەو زانیارییانەی دەست پۆڵەتیك پرێس كەوتووە، تاوەكو هەرێم و بەغدا بەشێوەی زارەكی رێككەوتنی تەواوەتی نەكەن شاندی هەرێم سەردانی بەغدا ناكات.

زانیارییەكانی پۆڵەتیك پرێس كە لەسەرچاوەیەكی ئاگادارەوە دەستی كەوتووە، ماوەی چەند رۆژێكە هەرێم و بەغدا لەچەندین ئاستدا گفتوگۆو راگۆڕینەوەیان لەسەر ناردنی پشكی هەرێم و چونی شاند بۆ بەغدا كردووە.

لەزانیارییەكاندا هاتووە، كازمی بە بەرپرسانی هەرێمی راگەیاندووە ناتوانێت موچەی مانگەكانی كۆتایی ئەمساڵ بنێرێت، بەڵام لە هەوڵی ئەوەدایە موچەی مانگەكانی (پێنج، شەش، حەوت، 10) ی ئەمساڵ بنێرێت، چونكە پشكی هەرێمەو پێشتر نەنێردراوە.

ئەو سەرچاوەیە باسی لەوەكرد، هەوڵەكانی چەند رۆژی رابردو بەتایبەت هەوڵەكانی لاهور شێخ جەنگی هاوسەرۆكی یەكێتی رۆڵی باشی هەیە بۆ نەهێشتنی گرژییەكان و لێك نزیكبوونەوەی هەرێم و بەغدا.

وتیشی، “شاندەكەی هەرێم كاتێك دەچنە بەغدا كە تەواو دڵنیا بن لەوەی پێش چوونەكەیان رێككەوتن لەسەر چارەسەری كێشەكانیان كراوەو بە ئەنجامێكی باشەوە دەگەڕێنەوە”.

زیاتر لە 40 رۆژ بەسەر دابەشكردنی موچەی مانگی 9 ی فەرمانبەرانی هەرێم تێپەڕیووە، بەڵام هێشتا حكومەتی هەرێم هیچ وادەیەكی بۆ دابەشكردنی موچە دیارینەكردووە.

لەئێستاشدا هاوڵاتیان و فەرمانبەرانی هەرێم چاوەڕێی ناردنی 320 ملیار دینارەكەی بەغدان تاوەكو خشتەی موچە رابگەیەنرێت، لەئێستاشدا باس لەوەدەكرێت گەر بەغدا پارەكە نەنێرێت ئەوا حكومەت بەرێژەیەكی زۆری لێبڕینەوە مووچە دابەش بكات.