پۆڵەتیك پرێس:
لەلایەن دوو خێرخوازی شارەكەوە، كارگەیەكی بەرهەمهێنانی ئۆكسجین بۆ نەخۆشخانەی وەفا لە شاری هەڵەبجە دروستدەكرێتو بەڕێوەبەری نەخۆشخانەی وەفاش دەڵێت: دروستكردنی ئەو كارگەیە سودێكی زۆری بۆ نەخۆشخانەكەمان دەبێت.
دكتۆر ئاراس حەمە سەعید فەرەج بەڕێوەبەری نەخۆشخانەی وەفا لەشاری هەڵەبجە بۆ پۆڵەتیك پرێس وتی: لەلایەن دوو سەرمایەداری شاری هەڵەبجە، كە بریتین لە ئاسۆ حاجی محەمەد بامۆكی و حاجی عابد هەورامی كارگەیەكی بەرهەمهێنانی ئۆكسجین بۆ نەخۆشخانەكەمان دروستكراوە و لەماوەیەكی كەمدا دەست بە بەرهەمهێنانی ئۆكسجین دەكات، بە دروستكردنی ئەم كارگەیەش تا رادەیەكی زۆر كێشەی نەمانی ئۆكسجین لە نەخۆشخانەكەمان چارەسەردەبێت.
بەڕێوەبەری نەخۆشخانەی وەفا وتیشی: تائێستا لە سلێمانییەوە بەتەنكەر ئۆكسجینمان بۆ دێت بۆ هەر یەك تەن ئۆكسجین 550 هەزار دیناری پێدەدەین، كە لەماوەی شەو و رۆژێكدا زیاتر لە دوو تەن بەكاردەهێنرێت بۆ تووشبووانی كۆرۆنا.
لەئێستادا لە نەخۆشخانەی چارەسەركردنی بەركەوتووانی چەكی كیمیایی 24 تووشبوو لە نەخۆشخانەی وەفاش 23 تووشبووی دیكەی ڤایرۆسی كۆرۆنا خەوێنراون.