ئەوەی چووە هەولێر نەگەڕایەوە !

ژمارەی بینین: 490

دوای فەتحی شارەزوور لەلایەن سوپای ئیسلامەوە، عومەری كوڕی خەتاب نامەیەكی بۆ (فرقد بن سلمی الاشجعی) سەركردەی سوپای مسوڵمانان بۆ سەر شارەزوور ناردو داوای لێكرد بگەڕێتەوە بۆ پایتەختی خەلافەت، ئەویش لە وەڵامدا وتی: نایەمەوە.. ئەو بەهەشتەی خودا بەڵێنی داوە لێرەیە.

تۆ بڵێی هەولێر بەهەشتی ژمارەیەكی بەرچاوی یەكێتییەكان نەبێت؟ كە ناردماننە ئەوێ نەگەڕانەوە، یان وەك میوان دێنەوە سلێمانی و بنەو بارگەو ماڵ و منداڵ و هەتا عەقڵ و بڕیاریشیان لەهەولێرە.

زۆرینەی گۆڕانەكان، كە چوونە بەهەشتی هەولێر نەگەڕانەوە، ئەمیری كۆمەڵ لەوێیەو ناگەڕێتەوە، هەرچی نوێنەری كەمە نەتەوەو پێكهاتەكانە ژمارەیەكی زیادكراوی دەنگی پارتین‌و هەولێر بەهەشتی ئەوانە.

ئێوەش بگەڕێنەوەو سەرنجێك بدەن لەوتارو ڤیدیۆو چاوپێكەوتنی بانگەشەی هەڵبژاردنی سەرۆك و هەندێك لەپەرلەمانتارەكانی یەكێتی، لەدوای پرۆسەی ئازادی عێراقەوە تائێستاش، بەر لە هەڵبژاردنەكان شێری مەیدانی ململانێكانی یەكێتی بوون، دۆسیەی گەندەڵی‌و نەوت‌و بەهەدەردانی سامانی گشتی‌و ناعەدالەتی‌و نەبوونی شەفافییەت‌و موچەو قووتی خەڵك خەمی یەكەم و لەپێشینەیان بوو! دوای هەڵبژاردنیشیان، ئەوەی بە لایانەوە گرنگ نەبێت ئەو وشە قەبەو بریقەدارانەن، كە بانگەشەیان بۆ دەكرد.

تۆ بڵێی هۆكارەكەی چی بێت؟ ئایا پارتی بە فیعلی بەهەشتێكی وای بۆ دروستكردوون بەخواردنی سێوی حەڵاڵی یەكێتیش لەو بەهەشتە نەتوانن دابڕێن، یاخود سێوی قەدەغەكراویش دەخۆن و پارتیش لە بەهەشتەكەی دەریانناكات؟

ئەوە وتمان بەر لە كۆنگرەی چوار تەكەتول تەحەكومی دەكرد و سەرۆك و ئەندامانی پەرلەمان و وەزیرو دانانی بەڕێوەبەری قوتابخانەكان و تا بەرپرسی كەرتەكانی ڕێكخستنیش لەڕێگەی موحاسەسەوە دابەش دەكران، ئەدی ئێستا بۆ؟

ئەی كۆنگرە كۆتایی بە تەكەتول نەهێنا؟ ئەی نەمانگوت كەس گرەو لەسەر ناكۆكی ئامۆزاكان نەكات‌و ئەوان یەك گیانن لە دوو جەستەو سێ جەستەدا؟

ئەی نەمانگوت با شۆڕشگێڕەكانی شاخ پشوویەك بە جەستەی ماندوویان بدەن‌و ڕێگە چۆڵكەن بۆ كچ و كوڕە خوێنگەرمە تەكنۆكراتەكان؟ ئەی بڕوانامەی دكتۆرامان فەرز نەكرد بەسەر ماندووەكانی پێشمەرگایەتی‌و یەكێتییە خوێن سەوزە دەروێش ئاساكان؟

ئەی نەمانگوت پێویستە پرنسیپەكانی ئیلتیزام‌و زەبت و ڕەبتی حیزبایەتی بگەڕێتەوە ڕیزەكانمان و هەریەكەمان بە گوێرەی پلەبەندی‌و لێپرسراوی حیزبی، پێ بە گوێرەی بەڕەكەی خۆی ڕاكێشێت؟ ئەی بڕیار نەبوو پرنسیپی پاداشت و سزا زیندوو بكەینەوە؟

ئەگینا چی پەیڕەو و پرۆگرامێك، چی پرنسیپێكی حیزبی، چی ئیلتیزامێكی پلەبەندی ڕێگە دەدات هاوسەرۆكان و مەكتەبی سیاسی حیزبێك بڕیار بدەن بەرپرسێك بەشداری كۆبوونەوەیەك نەكات‌و دوای چەند كاتژمێرێك، سەرۆكی پەرلەمان بەشداری بكات؟

سەمەد زەنگەنە