دەكرێت فرسەت سۆفی كوژرابێت؟

ئێستا دوای سێ ڕۆژ لە مردنی د. فرسەت سۆفی، بێ ئەوەی بەڵگەیەك یان سەرەداوێك هەبێ، گومانكردن لەمردنەكەی بووەتە باسی ناو خەڵكی ئاسایی و شتەكە لەوە دەرچووە گومانی چەند كەسێكبێت، كە لە هەموو شتێكی پارتی بەگومانن.

زۆر كەس دەپرسن: تۆبڵێی ڕاستبێ كە فرسەت كوژرابێ؟

سادەترین پرسیار كە لە گیانلەدەستدانی فرسەت سۆفیدا دروست دەبێ ئەوەیە: كێ دەتوانێ كوڕی مەسعود بارزانی لەناو هەولێردا بكوژێ وەكو لە پەیامی هاوخەمییەكەیدا، بارزانی بە كوڕی خۆی، وەسفی فرسەتی كردبوو؟

وەڵامەكەی ئاسان نییە بۆ كەسێك كە نەتوانێ بێبەڵگە و لە ختوخۆڕایی تۆمەت و تاوان ببەخشێتەوە چونكە لانیكەم ئێستا بچووكترین بەڵگەی سەلمێنەرت لەبەردەستا نییە كە نیشانی بدات د. فرسەت سۆفی كوژراوە.

بەڵام وەڵامی ئەم پرسیارە زەحمەت نییە كە بۆچی دەبێ فرسەت سۆفی بكوژرێ؟

فرسەت پارێزگاری پایتەختی هەرێمی كوردستان بوو، ئەم پارێزگایە لە هیچ پارێزگایەكی تری عێراق و هەرێمی كوردستان ناچێ لەڕووی گەشە و ئاوەدانیی و لەخۆگرتنی ملیاران دۆلار لە پڕۆژەی وەبەرهێنان و پیشەسازیی و بزنسدا. تەنانەت لەم ساڵانەیشدا كە قەیرانی سیاسی و ئابووری هەرێم لە ترۆپكدا ماوەتەوە.

لەناو ئەم پارێزگایەدا بەرژەوەندی و ئابووریی دوو جەمسەری بەهێزی ناو بنەماڵەی بارزانی …نێچیرڤان و مەسروور بارزانی… لە بەریەككەوتنێكی ڕاستەقینە و سەختدان.

توركیا بە قورساییەكی گەورەی ئابووریی و سیاسی و ئیسختباراتییەوە، چاوی لەسەر هەولێرە بێ ئەوەی بۆ یەك چركەیش چاو لەو بەرژەوەندییانە بخڵافێنێ.

ئەو هەموو پڕۆژەیەی هەڵڕژاوەتە ئەم پارێزگایەوە، ئەو ملیاران دۆلارەی سەرفكراوە یا هێشتا سەرمایەگوزاریی تێدا دەكرێ، بە كەمی تیایاندایە نەئاڵابن بە گەندەڵیی.. قۆرغكاری.. دزی و خۆسەپاندنەوە. هەزاران مەتر زەوی و سەدان پڕۆژەی گەورە و زەبەلاح هەن بە ناقانوونیی و بەرتیل و واسیتە دراون بەخاوەن پڕۆژەكان. بێگومان لە ژینگەیەكی وادا تاقم و پێڕی مافیا ئاسیا هەڵدەتۆقن و ئامادەن تا لێواری مردن و كوشتن، پارێزگاری لەو دەسكەوتە ناشەرعیی و ناقانوونییانەیان بكەن كە بەئاسانیی دەستیانكەوتووە.

لە پەیامی مەسروور بارزانی بۆ مردنی د. فرسەت ئاماژەیەك بەوە دەدات كە د. فرسەت زۆر هاوكاری بووە لە پڕۆژەی چاكسازییدا.

خۆ دیارە چاكسازیی لە پارێزگای هەولێردا، تەنیا چاككردنی رۆتیناتی فەرمانگەو كەمكردنەوەی خەرجیی و زۆركردنی داهات نییە. بەڵكو وەكو دارژەندنە لە شێری برسی كاتێ دەمی لەناو كەلاكی ئاسكێكی ناسكدایە.

د. فرسەت سۆفی تا زیندووبوو، وەكو پارێزگاری هەولێر چ بەئاشكرا و چ بەناڕاستەوخۆ چەندبارەی دەكردەوە: لە ڕووبەڕووبوونەوەی گەندەڵیی و قۆرغكاریدا جدین و چاوپۆشیی لە هیچ كەسێك ناكەن!

قۆرغكار و سەرەزلەكانی گەندەڵی لە هەولێر، بە ئەستەم خەڵكی كەم دەسەڵات و بێ پشتوپەنان. فرسەت باش دەیزانی لە بن كێوێك لە قۆرغكار و گەندەڵاندا وەستاوە، بەڵام پشت ئەستووربوو بە پشتیوانییەكانی مەسروور بارزانی وەكو جەمسەرێكی گەورەی ململانێكانی ناو پایتەخت.

فرسەت سۆفی كە پارێزگاربوو، لە میدیا و تۆڕە كۆمەڵایەتییەكان زۆر لەو وێنانەی بڵاودەكرایەوە كە دەچووە ناو خەڵكی سادە و هەژاران، بەڵام لە ئۆفیسەكەی خۆی لەگەڵ ئەو سەرەزلانە چەلەحانێی دەكرد كە چنگیان لە خێروبێری هەولێر گیربووەو نایانەوێ بەناوی چاكسازییەوە، شتێك لەدەست بدەن. هەرگیز ئەمانە نیشان نەدەدران لە میدیا.

كەواتە ئەگەر فرسەت سۆفی كوژرابێ، كێ دەوێرێ بیكوژێ؟

لەو شوێنانەی پارەی زۆر بە ڕێگای ئاسان دەست مفتەخۆران دەكەوێ، لەو شوێنانەی یاسا وەكو گریس رێگای گەندەڵیی و دزی بێسنوور چەور دەكات، لەو شوێنانەی سەروبنی بەرژەوەندی تێكەڵ دەبن و هیچ هێز و حكومەتێك ناتوانێ لێكیان بكاتەوە، زۆر ئاسانە پێڕ و تاقمی مافیا، گروپی ترسناك لەگەڵ مەسڵەحەتە زەبەلاحەكان ببنە شەریك و هەموو ئاستەنگ و مەترسییەكان ڕابماڵن. ئیتر با ئاستەنگ و مەترسییەكە كوڕی سەرۆكیشبێ.

من هێشتا دڵنیا نیم د. فرسەت سۆفی كوژراوە یان بە كۆرۆنا مردبێ چونكە هیچ بەڵگەیەكم لەبەردەستا نییە، بەڵام دڵنیابووم رێگای فرسەت لە هەولێر پەڕینەوەبوو بەناو مینی شاراوەو ئاشكراو هەندێكی تەوقیتكراودا.

هەولێر تەنیا پایتەختی هەرێمی كوردستان نییە، بەڵكو شتێكە هاوشێوەی عەممانی پایتەختی ئەردەن، كە تێیدا وڵاتانی رۆژئاوا لە عەممانەوە چاودێری رۆژهەڵاتی ناوەڕاست دەكەن. بارەگا و ئۆفیسەكانیان لەو شارە مۆڵداوە، بەرژەوەندییەكانیان لەوێوە دابەش دەكەن و بووەتە ماڵی دووەمیان لەمبەری زەریا و ئۆقیانووسەكانەوە. بۆیە عەممان تەنیا شاری ئەردەنییەكان نییە بەڵكو لەژێرەوە شاری ئاڕاستەكردنی مەسڵەحەتەكانی وڵاتانی رۆژئاوا بەتایبەت ئەمریكایە.

هەولێریش بووەتە ماڵێكی تر بۆ بەرژەوەندی سیاسی و ئابووریی و ئیستخباراتیی وڵاتانی ئیقلیمیی و نێودەوڵەتیی، بۆیە ئەو ملیاران دۆلارەی هەڵڕژاوەتە ئەم شارە بێخاوەن نین و سەرەزلەكان بزانن ملیاران دۆلارەكەیان لە مەترسیدایە، قۆڵی لێهەڵدەماڵن و پێكەوە ڕووبەڕووی مەترسییەكانیان دەبنەوە.

ئەگەر د. فرسەت بە كۆرۆنا مردبێ شتێكی ئاساییە وەكو مردنی ئەو ملیۆن و چەند سەد هەزارەی لە جیهاندا بە كۆرۆنا مردوون. خۆ ئەگەر كوژرابێتیش ئەوە شتێكی ئاساییە وەكو ئەو دەیان كەسەی لە جیهاندا لە پێناو تێكنەچوونی بەرژەوەندی سەرەزلەكاندا سەریان داناوە.

دیسان دەیڵێمەوە، هێشتا هیچ بەڵگەیەك لەبەردەستا نییە كە كوژرابێ، بەڵام هیچ ئەگەرێكیش دوور نییە كە گومانەكە لەجێی خۆیدابێ. بەس كێ بكوژە و بۆچی كوژرابێ وەڵامەكەی سەخت و ئاڵۆزە بەقەدەر ئەو بەرژەوەندییە ئاڵۆزاوانەی لە هەولێردا بەناو یەكترداچوون!

كاوە شێخ عەبدوڵڵا