پۆڵەتیک پرێس
سەرۆک وەزیرانی عێراق جەختی لەوە کردەوە حکومەتەکەی پابەند دەبێت بە وادەی بەڕێوەچوونی هەڵبژاردنی پێشوەختە چونکە ئەوە داواکاری گەل و شۆڕشی تشرینە.
نوسینگەی سەرۆک وەزیرانی عێراق مستەفا کازمی بڵاویکردەوە، کازمی پێشوازی لە ئەندامانی کۆمسیۆنی باڵای سەربەخۆی هەڵبژاردنەکان کردووە و تێیدا جەختی لە بەڕێوەچوونی هەڵبژاردنی پێشوەختە لە ٦ی حوزەیرانی ساڵی داهاتوو کردووەتەوە.
ئەوەش هاتووە، کازمی بە ئەندامانی کۆمسیۆنی وتووە: هەرچییەکتان پێویستە بۆ بە بەڕێوەچوونی هەڵبژاردنی پێشوەختە لە وادەی خۆیدا، ئێستا داوای بکەن تا لە نزیکترین کۆبوونەوەی ئەنجومەنی وەزیراندا تاوتوێ بکرێن و بڕیاریان لەسەر بدرێت.
کازمی ئاماژەی بەوەش کرد، پێویستە شەو و رۆژ کار بکەین لەپێناو بەدیهێنانی سەرجەم پێداویستیەکان بۆ سەرکەوتنی هەڵبژاردن و بەڕێوەچوونی لە وادەی خۆیدا.
ئەوەش لەکاتێکدایە، لەماوەی رابردوودا چەند جارێک هەواڵی دواخستن و گۆڕینی وادەی بەڕێوەچوونی هەڵبژاردنی پێشوەختەی پەرلەمانی عێراق بڵاوکرایەوە.