گرژی و ئاڵۆزی لەنێوان سووپای عێراق و جووتیارانی کورد لە کەرکوک دروستبوو

پۆڵەتیک پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

رۆژی دووشەممە لە سنووری سەرگەڕان لە پارێزگای کەرکوک جووتیارانی کورد ویستیان زەوییەکانیان بکێڵن بەڵام سوپای عێراق و ژمارەیەک لە هێزی چالاکییە مەدەنییەکان رێگرییان لێ کردن.

سووپای عێراق ئاماژە بەوە دەکات، بڕیاریان بۆ هاتووە  ڕێگریی لە جووتیارانی کورد بکەن زەوییەکانیان بکێڵن، جووتیارانی کوردیش ڕژدن لەسەر ئەوەی زەوییەکانیان بکێڵن و خاکەکەیان بەجێ نەهێڵن.

دیلان غەفوور، پەرلەمانتاری عێراق رایگەیاند، لەگەڵ وەزارەتی بەرگری لەسەر هێڵن و یاسای گەڕاندنەوەی موڵک بۆ خاوەنەکانیان، هەرچەندە لە رۆژنامەی فەرمی بڵاونەکراوەتەوە، سەرۆککۆمار پەسەندی کردووە و پابەندکەرە.

دەشڵێت، دەکرێت بۆ ماوەی هەفتەیەک تا 10 رۆژی دیکە لە رۆژنامەی وەقائیعی عێراقی بڵاوبکرێتەوە و بچێتە بواری جێبەجێکردنەوە.

وتیشی لەگەڵ بڵاوبوونەوەی یاساکە لە رۆژنامەی فەرمی، هەموو لایەنێک پابەند دەبێت بە جێبەجێکردنی.

هاوکات، داوای لە جووتیاران کرد: “ئەم چەند رۆژە دان بەخۆتان دا بگرن تاوەکو یاساکە بڵاودەبێتەوە.”