عێراق پەیامێک دەداتە ئەمریکا

پۆڵەتیک پرێس

عێراق پەیامی هاوسۆزیی خۆی بەبۆنەی کەوتنەوەی ئاگرەکەی ویلایەتی کالیفۆرنیا دەداتە ئەمریکا.

رۆژی هەینی 10ـی کانوونی دووەمی 2025، وەزارەتی دەرەوەی عێراق بەیاننامەیەکی سەبارەت بە ئاگرەکەی چەند رۆژی رابردووی لۆس ئەنجلۆس و چەند شارێکی دیکەی ویلایەتی کالیفۆرنیای ئەمریکای بڵاوکردەوە و تێیدا، “هاوسۆزیی بۆ حکومەت و گەلی ویلایەتە یەکگرتووەکانی ئەمەریکا” دەدەبڕێت “کە بەهۆی ئاگرەکەوە زیانێکی زۆر بە ژیان، موڵک و ماڵی هاووڵاتییانی ئەمریکا کەوتووە.”

وەزارەتەکە سەرەخۆشی و هاوخەمیی قووڵی خۆی بۆ کەسوکاری قوربانیان دەربڕی و جەختی لەوە کردەوە، “عێراق لەم هەلومەرجە سەختەدا لەگەڵ ئەمریکا دەوەستێت، هیوای زوو چاکبوونەوە بۆ بریندارەکان و گەڕانەوەی ژیانی ئاسایی لە ناوچە زیانلێکەوتووەکان لە زووترین کات دا دەخوازێت.”

چەند رۆژێکە ئاگرێکی بەتین لۆس ئەنجلۆسی و چەند شارێکی دیکەی ویلایەتی کالیفۆرنیای ئەمریکای گرتووەتەوە و بەگوێرەی ئامارە سەرەتاییەکان تا ئێستا لانیکەم 10 کەس گیانیان لەدەستداوە و زیاتر لە 180 هەزار کەسیش ئاوارەبوون. ئەمە جگە لە زەرەر و زیانە ماددییەکان کە بە نزیکەی 150 ملیار دۆلار دەخەمڵێندرێن.