هەسەدە: تورکیا لە رێگەی درۆنەوە هاووڵاتیانی سڤیلی کردووەتە ئامانج کە بەرەو بەنداوی تشرین رۆشتوون

پۆڵەتیک پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

هێزەکانی سووریای دیموکرات رایگەیاند، تورکیا لە رێگەی درۆنەوە ئەو خەڵکە سڤیلەی رۆژئاوای کوردستان دەکاتە ئامانج کە بەرەو بەنداوی تشرین دەچن و دەیانەوێت قەڵغانێکی مرۆیی لەو ناوچەیە دروست بکەن، تاوەکو رێگە لە ‌هێرشەکانی تورکیا بۆ سەر بەنداوەکە بگرن.

رۆژی چوارشەممە، 8ی کانوونی دووەمی 2025 ناوەندی میدیایی هێزەکانی سووریای دیموکرات (هەسەدە) بڵاویکردەوە، سوپای تورکیا لە رێگەی درۆنەوە، کاروانی هاووڵاتیانی سڤیلی کردووەتە ئامانج کە بەرەو بەنداوی تشرین لە باشووری رۆژهەڵاتی شاری منبج دەچن.

بەگوێرەی راگەیەندراوەکەی هەسەدە، لەئەنجامی هێرشەکەی تورکیا دا، شەهید و بریندار هەن.

ناوەندی میدیایی هەسەدە، راگەیاندووە، بەنداوی تشرین، سەرچاوەی سەرەکیی ئاو و کارەبای خەڵکی باکووری رۆژهەڵاتی سووریایە و خەڵکی زۆر لە ناوچەکانی دیکەوە بۆ مەبەستی رێگری لە هێرشەکانی تورکیا بۆ سەر ئەو بەنداوە، بەرەو بەنداوەکە چوون، بەڵام لەلایەن تورکیاوە بە درۆن کراونەتە ئامانج.

بەر لەو هێرشە، هەسەدە راگەیەندراوێکی بڵاوکردەوە و رایگەیاند، مەترسی تەقینی بەنداوی تشرین هەیە، بەهۆی هێرشی بەردەوامی تورکیا و گرووپە چەکدارەکانی سووریا کە تورکیا پاڵپشتیان دەکات.

بەنداوی تشرین لەنێوان منبج و کۆبانێیە و لەژێر دەسەڵاتی هێزەکانی سووریای دیموکرات (هەسەدە)یە، 80 کیلۆمەتر لە سنوورەکانی تورکیاوە دوورە، لە ساڵی 1999وە کارەبای ناوچەکانی باکووری رۆژهەڵاتی سووریا دابین دەکات، بەتایبەت سنوورەکانی شاری کۆبانێ، منبج و گوندەکانی دەوروبەریان.