بەم خۆراکانە خەوت باشتر بکە

پۆڵەتیک پرێس

چەندین رێگا هەیە بۆ باشترکردنی خەوی مرۆڤ، لەناویاندا، گۆڕانکاری کردن لە سیستمی خۆراکی، بەجۆرێک هەندێک خۆراک هەیە ئەگەر بەر لە خەوتن بیانخۆین دەچینە خەوێکی تەندروست و قوڵەوە.

ئەمانەی خوارەوە چەند خۆراکێکن دەبنەهۆی باشترکردنی خەوی مرۆڤ:

١- بادەم

بادەم دەوڵەمەندە بە زۆر مادەی خۆراکی بەسود، لەوانەش فۆسفۆر و مەنگەنیز، هاوکات، سەرچاوەی هۆرمۆنی میلاتۆنینە، ئەو هۆرمۆنەی دەبێتە هۆی رێکخستنی کاتی ناوەکی مرۆڤ و ئامادەکردنی جەستە بۆ خەوتن.

٢- کیوی

کیوی دەوڵەمەندە بە سیرۆتۆنین و مادە دژە ئۆکسانەکان، کە هەردووکیان یارمەتیدەرن بۆ باشترکردنی خەوی مرۆڤ.

٣- ماسی سەلەمون و تونا

خاسیەتی سەرەکی ئەم جۆرە خۆراکە بوونی رێژەیەکی زۆری ڤیتامین دی و ترشی چەوری ئۆمێگا سێیە کە خواردنیان بەر لە خەوتن دەبێتەهۆی ئاسانکردنی خەو و باشترکردنی.

٤- برنجی سپی

برنجی سپی دەبێتەهۆی بەرزکردنەوەی رێژەی شەکری خوێن لە جەستەدا، بۆیە خواردنی بەر لە خەوتن دەبێتەهۆی بەدیهێنانی خەوێکی باش و قوڵ.

٥- خۆراکە شیرەمەنییەکان

خورادنەوەی کوپێک شیر یان خواردنی پەنیر و ماست و شیرەمەنییەکان دەبنەهۆی ئەوەی مرۆڤ بچێتە خەوێکی تەندروستەوە بەتایبەت ئەو کەسانەی لە تەمەنێکی پێگەیشتوودان.