نرخی تەماتە لە سلێمانی بەرزبووەوە

پۆڵەتیک پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

نرخی تەماتە و سەوزەواتەکانی وەک خەیار و بیبەر لە سلێمانی بەشێوەیەکی بەرچاو بەرزبووەتەوە و سەرۆکی لیژنەی سەندیکای عەلوەی سلێمانیش هۆکارەکەی بۆ کەمیی بەرهەمی ناوخۆ و زۆریی باج لەسەر هاوردەکردنیان دەگەڕێنێتەوە.

سەروەر عەلی، سەرۆکی لیژنەی سەندیکای عەلوەی سلێمانی بە پۆڵەتیک پرێسی راگەیاند، بەهۆی کۆتاییهاتنی وەرزی بەربوومی ناوخۆیی و هاتنی وەرزی سەرما، تەماتە و سەوزەی پێنجوێن کە بەشێکی سەرەکیی بازاڕی عەلوەی شاری سلێمانی پێکدەهێنێت بەرەو کەمی چووە و و زۆریی باج لەسەر هاوردەکردنی لە دەرەوەی وڵات، نرخی تەماتە و خەیاری بەشێوەیەکی بەرچاو بەرزکردووەتەوە.

روونیکردەوە، لەم وەرزەدا تەماتە لە وڵاتانی دراوسێی وەک ئێران و سوریاش گرانە و ئەگەر ئەو باجەی لەسەر هاوردەکردنی تەماتە هەیە لابچێت (750 دینار بۆ هەر کیلۆیەک) ئەوا نرخەکەی لە بازاڕدا لە 1000 دینار کەمتر نابێت.

نرخی کیلۆیەک تەماتە ئەمڕۆ دووشەممە بە هەزار و 300 دینار لە عەلوەی شاری سلێمانی فرۆشراوە و دووکاندا ر و بەقاڵەکانیش رێژەیەکی کەمی دەخەنە سەر و بە 1500 دینار دەیفرۆشنە هاووڵاتییان.

بە وتەی سەروەر عەلی، ئەو تەماتەیە لە سوریاوە هاوردەکراوە و لە بەغداوە گومگرک کراوە و گەیەندراوەتە عەلوەی سلێمانی، سەرەڕای بەرزیی نرخەکەی بەڵام کوالێتییەکەی باش نییە.

جگە لە تەماتە، نرخی سەوزەکانی وەک کولەکە، بیبەر و نرخەکانیان لە سلێمانی بەرزبووەتەوە.

بەپێچەوانەی سەوزەواتەکان، نرخی میووە لەم وەرزەدا دابەزیووە و نرخی ترێ، هەنار، سێو و لالەنگی بۆ خوار نیوە دابەزیووە و هۆکارەکەشی بۆ زۆریی ئەو بەروبوومانە دەگەڕێتەوە.

عەلوەی سلێمانی بەشێوەیەکی سەرەکیی پشت بە بەرهەمی ناوخۆی ناوچەکانی پێنجوێن دەبەستێت، ساڵانە لەگەڵ هاتنی وەرزی سەرما بەرهەمی ئەو ناوچەیە روو لە کەمی دەکات و بەشی پڕکردنەوەی خواستی ناو بازاڕ ناکات.