بۆچی ئاڵای كوردستان دەسوتێنرێت؟

ئەم بابەتە 37 جار بینراوە

لەسەردەمی ڕژێمی بەعسدا، تاسەمان ئەوە بوو كە ئێمە وڵات و سیستەم و قوتابخانەو بازاڕمان هەبێت. تاسەمان ئەوە بوو كە بە ڕەنگ و دەنگی خۆمان بە زمانی خۆمان بدوێین ، بۆ نووسینەوەی مێژووی خۆمان ئازار و مەینەتی زۆرمان چەشت. باشە لە كۆتاییدا بەعس ڕۆیشت و سیستمەكەمان دروست كرد ئێستا فیدرالشبێت بە فەرمی وڵاتێكمان هەیە وشانازی بە وڵاتەكەمانەوە دەكەین شانازی بە مێژوو و ڕەنگ و دەنگی خۆمانەوە دەكەین.

وڵاتێكی دەوڵەمەند بە كشتوكاڵ و نەوتمان هەیە ،بەڵام مرۆڤ بیردەكاتەوە دەپرسێت بۆچی هێشتا هەژارین ؟ ! بۆچی ئێمە هەموو كات شەڕ دەكەین؟ بۆچی كۆتایی بە كێشەكانی ناو وڵاتەكەمان ناهێنین؟! حكومەت تا چەند هۆكاری بەردەوامی كێشەكانە؟ كاری سیاسەت و دەوڵەت ئەوەیە كە وەڵامی كێشەكە بداتەوە و چارەسەری بكات بەڵام لێرە حكومەت و سیاسەتەكەی ئەو كارەدەكەن؟

بەڕاستی ناتوانین بڵێین سیاسەتمەدارەكانمان نەزانن و نازانن سیاسەت بكەن هەموو باش دەزانن سیاسەت چییە و چی نییە. بۆ نموونە مرۆڤ دەتوانێت وەك سیاسەتمەدارێك باسی هۆشیارزێباری بكات.

هۆشیار زێباری پیاوێكی نەزان نییە لە ئوردن و ئینگلتەرا زانكۆی خوێندووە لە ساڵانی نەوەدەكاندا لە ئینگلتەرا و ئەمریكا فێری سیاسەت بووە بەڵام ئەمڕۆ هۆكاری كێشەیەكی گەورەیە لە وڵاتی ئێمەدا. هۆشیار زێباری بە زمانی خۆی شمشێرەكەی حەشدی شەعبی لە هەناوی ئێمە دەدات. بەهۆی سیاستی ئەوەوەیە ئاڵای كوردستان دەسووتێندرێت ئەقڵی سیاسی ئێمە جارێكی تر بەرەو شەڕی ناوخۆ ئاراستە دەبێت.

لێرەدا پرسیارێك دروست دەبێت ئایا ئەمەی هۆشیار زێباری دەیكات نەزانی سیاسەتە یان جێبەجێكردنی سیاسەتی ئەمریكا و ئینگلیزە؟ وەك لەسەرەوە باسمكرد هۆشیار زێباری كەسێكی نەزان نییە . لە شوێنە سەرنجڕاكێشەكاندا پەروەردەی سیاسەتی خوێندووە ئەو باش ئەم سیاسەتە دەزانێت. حەشدی شەعبی هەرچەندە حزبێكی عیراقیش بێت لە ژێر كۆنترۆڵی ئێراندایە و دەزانین كە ئەمەریكا و ئینگلتەرا ئەم هێزە سەربازییەیان لە عێراقدا ناوێت .

ئەمریكا و ئینگلتەرا سیاسەتی خۆیان لە رێگەی ئەندام و حزبە كوردییەكانیەوە پێشدەخەن. من وەك ڕۆژنامەنوس، نووسەر یان هاوڵاتیەك، دەمەوێت ئەمە بپرسم؛ ئایا پارتی دیموكراتی كوردستان چی دەوێت و چی قازانجێك دەكات؟ ئایا پارتی بەم سیاسەتەی، دەیەوێت هێزی حەشدی شەعبی لە شەنگال دەركات؟ شەنگال پارچەیەكی كوردستانە مرۆڤ كاتێك بە نەتەوەپەرستی بیر دەكاتەوە دەڵێت ئەمە باشە بەڵام دەزانین نە نەتەوە پەرستی چارەسەرەو نە و حەشدی شەعبیش لە شنگال دەچێتەدەرەوە. بۆیە نابێت ئێمە خۆمان فریوبدەین ئەم سیاسەتەی پارتی حیزبییە و سودێكی بۆ كورد نییە. كێشەی ئابووری چارەسەر ناكات، دەسكەوتی گەلەكەمان دەخاتە مەترسییەوە. دوای هێرشەكانی داعش، گەلەكەمان توانای نییە بچێتە ناو شەڕێكی نوێوە دەبێت لایەنگرانی ئەم ئاژاوەیە باش بزانن كە بەم سیاسەتەی پارتی گەل و دەستكەوتەكانمان پارێزراو نابن. دەبێت حكومەت و دەوڵەتەكەمان سیاسەت بكەن بۆ سەركەوتن، با لەبری ئەوەی قەیران و تەنگژە دروست بكەن كێشەی ئابووری وڵاتەكەمان چارەسەر بكەن.

هاوژین زیبا

پەخشی راستەوخۆی رادیۆ پۆلەتیک