لە بازگەی دێگەڵە رێگریی لە دەرچووانی زانکۆ و پەیمانگاکان کرا بچنە شاری هەولێر

پۆڵەتیک پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

رێگریی لە دەرچووانی زانکۆ و پەیمانگاکانی بەشێک لە پارێزگاکانی هەرێم کرا بچنە ناو شاری هەولێر و داواکاریی دامەزراندنیان بگەیەننە ئەنجوومەنی وەزیران.

سەرلەبەیانیی ئەمڕۆ چوارشەممە 11ـی ئەیلوولی 2024، بەشێک لە خوێندکارە یەکەمەکانی زانکۆ و پەیمانگاکانی سلێمانی، رانیە، کۆیە و ئیدارەی سەربەخۆی گەرمیان بەمەبەستی گەیاندنی داواکارییەکانیان بۆ دامەزراندنیان، بەڕێکەوتن بەرەو شاری هەولێر، بەڵام لە بازگەی دێگەڵە رێگریان لێکرا بچنە ناو شاری هەولێر و داوکارییەکەیان بگەیەننە ئەنجوومەنی وەزیران.

ئەو خوێندکارانە دەرچووی سێ یەکەمەکانی زانکۆ و پەیمانگاکانی ساڵانی 2018 بۆ 2023، ئەنجوومەنی وەزیرانی هەرێم پێشتر لە مانگی نیسانی ئەمساڵ بڕیاری دامەزراندنی دابوون، بەڵام وەک خۆیان دەڵێن، تا ئێستا بڕیارەکە جێبەجێنەکراوە و رێکارەکانی دامەزراندنیان وەک خۆی بەڕێوەناچێت.

ئەمڕۆش بەمەبەستی گەیاندنی داواکارییەکانیان ویستوویانە بچنە بەردەم بینای ئەنجوومەنی وەزیران کە هاوکاتە لەگەڵ کۆبوونەوەی ئەنجوومەنەکە و تاوتوێکردنی پرسی مووچە، شانبەشانی دەرچووانی سێ یەکەمەکانی پارێزگاکانی دیکەی هەرێم داواکارییەکانیان راستەوخۆ بگەیەننە حکومەت هەرێم، بەڵام لە بازگەی دێگەڵە رێگرییان لێکرا بچنە ناو شاری هەولێر.