پۆڵەتیک پرێس
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
رۆژی سێشەممە ئەنجوومەنی وەزیرانی عێراق بڕیاریدا پارەی هێزەکانی حەشدی شەعبی زیاد بکرێت. هاوکات بڕیاری زیادکردنی پارەی پرۆژەکانی دروستکردنی رێگەی قەرەتەپە – ئۆمەرمەندان و چوارڕیانی رێگەی بەغدا – کەرکووکی دەرکرد.
بەگوێرەی راگەیەندراوێکی نووسینگەی سەرۆکوەزیرانی عێراق، رۆژی سێشەممە 03-09-2024، ئەنجوومەنی وەزیرانی عێراق لە کۆبوونەوەی خۆیدا بڕیاریدا پارەی دەستەی حەشدی شەعبی بۆ ساڵی 2024 زیاد بکرێت، ئەوەش بۆ گەرەنتیکردنی پارەی مووچەی کارمەندانی حەشدی شەعبی و دەرماڵەکانیان.
بودجەی حەشدی شەعبی ساڵی 2024 چوار تریلیۆن و 556 ملیار و 611 ملیۆن دینارە؛ بەپێی خشتەکانی بودجە بۆ ساڵی 2024 حەشدی شەعبی 238 هەزار و 75 ئەندامی هەیە.
ئەنجوومەنی وەزیران بڕیاریدا بە زیادکردنی پارەی پرۆژەی دروستکردنی رێگەی قەرەتەپە – ئۆمەرمەندان، چوارڕیانی رێگەی بەغدا – کەرکووک بە درێژایی 22 کیلۆمەتر لە قۆناغی دووەمی پرۆژەکە. هەروەک پارەی پرۆژەی ئاوەڕۆی موسڵ – بەری راست زیاد کرا.
ئەنجوومەنەکە بڕیاریدا نرخی وەرگرتنی تۆنی برنجی عەنبەر لە 960 هەزار دینارەوە بۆ یەک ملیۆن دینار زیاد بکات. نرخی وەرگرتنی برنجی یاسەمین-یش وەکو نرخی ئێستای بمێنێتەوە کە 800 هەزار دینارە بۆ هەر تۆنێک.
ئەنجوومەنەکە دەسەڵاتی دایە راوێژکاری ئاسایشی نیشمانیی عێراق بۆ دانوستاندن و واژۆکردنی یاداشتنی لێکتێگەیشتنی هاوکاریی ئەمنی نێوان راوێژکارییەتی ئاسایشی نەتەوەیی عێراق و ئەنجوومەنی باڵای ئاسایشی نەتەوەیی ئێران.
هەروەها رەزامەندیدا لەسەر راسپاردەکانی کۆنووسی لیژنەی دیوانی 23995 کە پەیوەستە بە پرۆژەکانی رێککەوتنی چوارچێوەی چینی.
قەیوان گروپ
مایۆرکا سیتی جوانییەک لە دڵی سروشتدا
