ژنان لەبەردەم هێرشی سۆشیال میدیا

سۆشیال میدیا، لە ڕۆژگاری ئەمڕۆماندا بووەتە بەشێكی دانەبڕاو لە ژیانی تاكەكانی كۆمەڵگە، وەك داگیركەرێكی دڵ نەرم و جوان بێ ئەوەی پێشوازیشی لێ بكەین، گەشتۆتە هەموو ماڵێك، هاوڵاتی زۆر بەئاسانی ئەتوانێ دەستی پێ بگات، هەموو شتێك كە بیری لێ دەكاتەوە دەتوانێ لە سۆشیاڵ میدیا بڵاوی بكاتەوەو هەر كەسێكیشی بوێت ئەتوانی پەیوەندی لەگەڵ ببەستێ، كورت و كورمانجی هەموان لە ئێستا دوو ژیانیان هەیە ژیانێكی راستەقینە لەواقیعدا و ژیانێكی ڤیرچواڵ لە سۆشیاڵ میدیادا.

تۆڕەكانی سۆشیاڵ میدیا چەندین پلاتفۆرمی جیاوازیان هەیە، وەك فەیسبوك،تویتەر، سناپچات، ئنیستاگرام چەندانی تر، وەك ئەبینین لای خۆمان فەیسبوك لەهەموو پلاتفۆرمەكانی دیكە زیاتر بایەخی پێئەدرێت و بەكارئەهێنرێت.

گۆڕانكاری سەردەم و، زیادبونی پێداویستیەكان و، پێشكەوتنی تەكنەلۆژیاو، هۆكارێكن كە تۆڕە كۆمەڵایەتیەكان، كاریگەری ڕاستەوخۆیان لەسەر تاكەكانی كۆمەڵ هەبێت. ئیدی ئەو كاریگەریە سیاسی بێت یان ئابوری یان كۆمەڵایەتی.

ئەگەر باسی ئەوە بكەین، ئایا سۆشیال میدیا باشە یان خراپ؟
لەوەڵامدا ئەتوانین بڵێین دولایەنەیە، یان ئەوەی هەندێ كات شارەزایان ناوی ئەبەن بەچەكی دوسەر. واتە هەندێ كات ڕۆڵی هەبوە لە بەرجەستەكردنی ئازادی و بەشداری پێكردنی تاك لە بڕیارە چارەنوسازەكاندا، بەڵام ئێستا لە جیهانداو بەتایبەت ڕۆژهەڵاتی ناوەڕاست، بەهۆی قوڵبونەوەی ململانێ سیاسیەكانەوە كەوتۆتە دەست سیاسیەكان و خراپ بەكاری ئەهێنن، كە كوردستانی خۆمان پشكی شێری بەرئەكەوێت.

لێرەوە دێمە سەر ئامانجی باسەكەم، كە ئەویش هێرش و پەلاماردانی ژنان لەم ڕێیەوە؛

ئامادەیی ژنان لەسەرجەم كایە جیاوازەكاندا، بەئێستای سۆشیاڵ میدیاوە، هەمیشە بارگاوی بوە بەدژایەتی كردن و ڕێگری كردن، لە كارو تواناو دەربڕینەكانیان، لەهەر شوێن و جێگایەك توندوتیژی هەبێت، ژنان دەكرێنە سەرقافڵەو، دەكەونە بەرنەشتەری تانەو جەهالیەت.

ئەگەر لەڕابردودا، هەڕەشەو مەترسی و ڕێگریەكان بۆسەر ژنان لەلایەن چەند كەسێك یان گروپێكەوە بوبێت، لە ئێستادا لەڕێگەی سۆشیال میدیاوە ئەم باڵانسە زیادی كردوەو، دەست بۆ هزرو فكرو قەڵەم و هەموو پیرۆزیەكانی ژنان ئەبرێن بێگوێدانە، كەلتورو بەها ئەخلاقیەكانی مرۆڤایەتی، هەموو هەوڵ و ماندوبون و ڕابردوی تۆ لەبیرئەكات، تەنها كار لەسەر ناوزڕاندن و لەكەداركردنی كەسایەتیت ئەكات، بەداخەوە كەئەمەش مۆدێلێكی نوێ بوو، حزبە سیاسیەكان بەتایبەت لەكاتی بانگەشەی هەڵبژاردنەكاندا بەكاریان هێناو ئێستا بۆتە كەلتور، كەدواجار ئەمە ترسە لە تواناو ڕۆڵ و هێزی ژنان.

ماوەتەوە بڵێین،: هەموان ڕۆژانە لەبەردەم مەترسی هێرشی تۆڕە كۆمەڵایەتیەكانداین، بەتایبەت ئەو كەسانەی كە دیارن و پەپڵیفیگەرن لەناو كۆمەڵگا، زیاتر ڕوبەڕوی هێرش و توندوتیژی ئەبنەوە. هەربۆیە پێویستمان بەهۆشیاری و پەروەردەیەكی تەندروست و، یاسایەكی جیهانیە نەك ناوخۆیی، وەك ئەوەی ئێستا بۆتە باسی بەشێك لە ڕێكخراوە جیهانیەكان و گفتوگۆی لەسەرئەكەن، بە ئەمانجی بەكارهێنەرانی تۆڕی كۆمەڵایەتی وابەستە بكات بە ئەخلاقیات و ئیتك، بۆ ئەوەی كەرامەت و ئاسایشی نیشتمانی و تەونی كۆمەڵایەتی مرۆڤایەتی پارێزراوبێت.

ژینۆ محەمەد

پەخشی راستەوخۆی رادیۆ پۆلەتیک