رێبەر ئەحمەد: بەئامانجکردنی خەڵکی سڤیل نیشانەی لاوازی و بێ ئومێدیی دەستدرێژیکارانە

پۆڵەتیک پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

وەزیری ناوخۆی هەرێمی کوردستان دەڵێت، کردنە ئامانجی خەڵکی سڤیل لە هەرێمی کوردستان، نیشانەی لاوازیی دەستدرێژیکارانە. هێرشەکەی ئێرانیشی بە خستنە ژێرپێی خاڵەکانی رێککەوتنە ئەمنییەکەی عێراق و ئێران ناوبرد.

رۆژی شەممە، 24-02-2024، رێبەر ئەحمەد، وەزیری ناوخۆی هەرێمی کوردستان لە رێوڕەسمی چلەی ماتەمینی پێشڕەو دزەیی، سەرمایەداری کورد کە لە هێرشە مووشەکییەکەی سوپای پاسداران بۆ سەر هەولێر گیانی لەدەستدا، وتارێکی پێشکەشکرد و رایگەیاند، دوژمنانی ئارامی و ئاوەدانی، رێگەیان نەدا پێشڕەو دزەیی درێژە بە خواست و خولیاکانی لە پێناو پێشکەوتنی زیاتری شار و وڵاتەکەی بدات.

رێبەر ئەحمەد ئاماژەی بەوە کرد، گیانلەدەستدانی پێشڕەو دزەیی نابێتە هۆی ساردبوونەوە و تۆقاندنی وەبەرهێنەران و سەرمایەداران لە کەرتی تایبەت و خاوبوونەوەیان لە هەماهەنگیکردن لەگەڵ کەرتی گشتی و حکومەتی هەرێمی کوردستان؛ وتیشی، بەشێکی زۆری وەبەرهێنەران، لە رۆژانی سەخت و تەنگانەدا، جێ پەنجەیان لە هەرێمی کوردستان دیار بووە کە هاوکاری حکومەت و خەڵکی کوردستان بوون.

وەزیری ناوخۆی هەرێمی کوردستان وتیشی، بەئامانجکردنی خەڵکی سڤیل، بەتایبەتی وەبەرهێنەران و خاوەنکاران بە پاساوی بێ بنەما لە هەولێر، نیشانەی لاوازی و بێ ئومێدیی دەستدرێژیکارانە.

رێبەر ئەحمەد ئەوەشی خستەڕوو، هەولێر و هەرێمی کوردستان هەموو کات وەک هێمای ئاشتی، ئارامی و پێکەوەژیانی ئاشتیانە دەمێننەوە و سەرەڕای هەموو ئاستەنگ و ئاڵنگارییەکان هەر لە پێشکەوتن و سەقامگیری بەردەوام دەبن.

شەوی 15-01-2024ی سوپای پاسداران بە 11 مووشەک هێرشی کردە سەر هەولێر کە پێنج لەو مووشەکانە بەر ماڵی سەرمایەداری کورد پێشڕەو دزەیی کەوتن کە گیانلەدەستدانی خۆی و منداڵێکی تەمەنی کەمتر لە ساڵێک، لەگەڵ میوانێکی و کارگوزارێکی ماڵەکەی لێکەوتەوە؛ هەروەها 16 کەسیش بەهۆی هێرشەکەوە برینداربوون.

 

قەیوان گروپ

 


مایۆرکا سیتی جوانییەک لە دڵی سروشتدا