یەکێتی هەڵوێستی خۆی لەبارەی بڕیارەکەی دادگای فیدراڵیی راگەیاند

پۆڵەتیک پرێس:

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

یەکێتیی نیشتیمانیی کوردستان، هەڵوێستی فەرمیی خۆی لەبارەی بڕیارەکەی دادگای باڵای فیدراڵیی عێراق سەبارەت بە یاسای هەڵبژاردنی پەرلەمانی کوردستان ئاشکراکرد و رایگەیاند، “سیستەمی هەڵبژاردنی فرەبازنەیی مومارەسەیەکی باشتری هەڵبژاردنە وەک لە سیستەمی یەک بازنەیی”.

لەتیف نێروەی،  لێپرسراوی بۆردی راگەیاندنی یەکێتیی نیشتمانیی کوردستان لە کۆنگرەیەکی رۆژنامەوانیدا رایگەیاند: پاش راگەیاندنی بڕیاری دادگای فیدراڵیی عێراق، بەشێک لە میدیاکانی هەرێم هەوڵیاندا راستیەکان هەڵگێڕنەوە و راستیەکان لەبەرچاوی جەماوەر و خەڵکی کوردستان لێڵ بکەن. دەشڵێت، “یەکێتی دەمێکە خواستی ئەوەی هەیە کە یاسای هەڵبژاردنی هەرێم لە یەک بازنەییەوە بکرێت بە فرە بازنەیی”.

لێپرسراوی بۆردی راگەیاندنی یەکێتی ئاماژەی بەو هۆکارانە کرد کە یەکێتیی نیشتیمانیی کوردستانی پێداگرتر کردبوو لەسەر سکاڵاکە.

یەکێک لەو هۆکارانە ئەوەبوو کە یەکێتی ویستوویەتی سیستەمی هەڵبژاردنی هەرێمی کوردستان هاوتەریبی سیستەمی هەڵبژاردنی عێراقی فیدراڵ لێبکات.

هەروەها دەشڵێت، “بەم سیستەمە، چیتر لەسەر حسابی پارێزگایەک کاندیدکی پارێزگایەکی دیکە دەرناچێت بۆ حکومەت؛ پێشتر نموونەی لەم شێوەیە زۆربووە و لەکۆتاییدا بەربژێرەکە نەیتوانیووە خزمەتی دەنگدەرانی خۆی بکات”.

بە وتەی لەتیف نێروەی، سودێکی تر ئەوەیە؛ بەپێی سیسمتە کۆنەکە، زۆر جار پشک و مافی پارێزگایەک بۆ پارێزگایەکی دیکە چووە و بە سیستەمی هەڵبژاردنی ئێستا پشکی هەر پارێزگایەک وەک خۆی دەمێنێتەوە و کار ئاسانی بۆ بەربژێرەکان دەرەخسێت کە باشتر بانگەشە بۆ بەرنامەکەیان بکەن لەناو خەڵکدا.

بابەتی پێکهاتەکان

لەتیف نێروەی دەڵێت، “هەڵوێستی یەکێتیی نیشتیمانیی کوردستان بەرامبەر پێکهاتەکان هەڵوێستێکی نەگۆڕە و وەک سەرۆک مام جەلال چۆن لە رابردوودا هەمیشە پاڵپشت و پشتیوانیی پێکهاتە کەمایەتییەکانی هەرێمی کوردستان بوو، ئێمەش لە یەکێتیی نیشتیمانیی کوردستان بەردەوامیی دەدەین بە رێبازی سەرۆک مام جەلال”.

بە ووتەی  لێپرسراوی بۆردی راگەیاندنی یەکێتیی نیشتمانیی کوردستان، ئەوان بە کردەوە هەوڵ بۆ پاراستنی مافی پێکهاتەکان لە هەرێمی کوردستان دەدات و “باشترین نموونەش هەوڵەکەی سەرۆک مام جەلال بوو لە پاراستنی مافی کەمایەتییە نەتەوەکان لە کەرکووک لە پاش پرۆسەی ئازاکردنی عێراق؛ بە دابەشکردنی پۆستی پارێزگاکە لە نێوان کورد و عەرەب و تورکمان و هەر یەکەیان بە رێژەی ٪32ـی یەکسان”.

مووچەی فەرمانبەران

یەکێکی دیکە لەو بابەتانەی کە رۆژی 21-2-2024، دادگای باڵای فیدراڵیی عێراق بڕیاری لەبارەوەدان بریتی بوو لە پرسی مووچەی فەرمانبەرانی هەرێم.

بەگوێرەی بڕیار و راسپاردەکان، دادگای فیدراڵیی عێراق هەرێمی کوردستانی ناچارکرد بە رادەستکردنی تەواوی داهاتە نەوتی و نانەوتییەکان لەپێناو مسۆگەرکردنی مووچەی فەرمانبەران و پشکی هەرێم لە بوودجەی عێراق.

دادگای فیدراڵیی ئەوەشی خستەڕوو، دەبێت حکومەتی ناوەندیی عێراق مانگانە بڕە پارەیەک بۆ مووچەی فەرمانبەرانی هەرێم بەبێ ناولێنانی ‘قەرز’ بنێرێت.

لێپرسراوی بۆردی راگەیاندنی یەکێتیی نیشتمانیی کوردستان دەربارەی ئەو بابەتە روونکردنەوەی دا و ووتی، “سەرۆکی یەکێتیی نیشتیمانیی کوردستان زیاتر لە هەر سەرۆک حزبێکی دیکە بۆ مەسەلەی مووچە سەردانی بەغدای کردووە، هەندێک لایەن دەیانووت ئەو [بافڵ تاڵەبانی] هێندە سەردانی بەغدا دەکات و هیچ بەرهەمێکی نییە، بەڵام دواجار خۆشبەختانە هەوڵی یەکێتیی نیشتیمانیی کوردستان لەبارەی زامنکردنی مافەکانی فەرمانبەران و مووچەخۆرانی هەرێم لە بەغدا سەرکەوتوو بوو و ئەو بایکۆتەی لە دەڤەری سلێمانی هەبوو، شکێندرا و ئێستا ناوەندەکانی خوێندن کراونەتەوە”.

 

قەیوان گروپ

 


مایۆرکا سیتی جوانییەک لە دڵی سروشتدا