ناوەندی مەم و زین یەکەم فێستیڤاڵی ساڵانەی ساز دەکات

ئەم بابەتە 31 جار بینراوە

پۆڵەتیک پرێس

لە پێناو زیاتر گرنگیدان بە زمان و وێژە و فەرهەنگی کوردی، ناوەندی ڕۆشنبیریی مەم و زین لە شاری هەولێر، یەکەمین ڤیستیڤاڵی ساڵانەی خۆی لە دووەمین ساڵیادی دامەزراندنی خۆی سازدەکات لەژێر درووشمی :

دا خەلقی نەبێژتن کو ئەکراد
بێ مەعریفەتن، بێ ئەسڵ و بنیاد

فێستیڤالەکە رۆژی هەینی ٩ ی ئەم مانگە کاتژمێر ٦ ی ئێوارە بەڕێوە دەچێت.

مەم و زین لە ڕۆژی ٩ی تشرینی یەکەمی ٢٠١٨ وەک کتێبخانە و سەنتەرێکی کولتووریی سەربەخۆی ئەهلی دامەزراوە و لە لایەن چەند گەنجێکەوە خاوەندارێتیی دەکرێت و بەڕێوەدەبرێت. یەکێکە لە ناوەندە چالاکە کولتوورییەکانی هەرێمی کوردستان.

کتێبخانەی مەم و زین بە پێنج زمانی جیاواز کتێب دەفرۆشێت، مەم و زین کاری چاپ و بڵاوکردنەوەش دەکات. کافێی مەم و زینیش بەشێکە لە ناوەندەکە، مەم و زین کۆڕ و کۆبوونەوەی ڕۆشنبیریش ساز دەکات و مانگانە چەندین کۆڕ و کۆبوونەوەی لێ ئەنجام دەدرێت.

بەرنامەی ڤیستیڤاڵ بریتی دەبێت لە : ڕاپۆرتی کار و چالاکییەکانی ساڵێکی مەم و زین، بەخشینی خەڵاتی ڕێزلێنانی ساڵانە، وتەی کەسایەتی و ڕۆشنبیران دەربارەی مەم و زین، بەخشینی دیاری بە ئامادەبووان، پێشکەش کردنی چەند پارچە مۆسیقایەک.

وەک ناوەندەکە ڕایگەیاندووە، ئەمساڵ بەهۆی پەتای کۆرۆنا، ڤیستیڤاڵی مەم و زین کورتخایەن دەبێت و چالاکیی زۆری تێدا نییە، بەڵام بۆ ساڵانی داهاتوو بەرنامەی ڤیستیڤاڵ زۆر فراوانتر دەبێت.