خولێكی داوەری موای تای دەكرێتەوە

پۆڵەتیك: سپۆڕت
چالاكییەكانی یەكێتی موای تای عێراق لە شاری سلێمانی چڕتر دەبێتەوە پاش ئەوەی لە ماوەی ڕابردوو چالاكی یەكەمی موای تای هونەری بەرگری تایلەندی لە شاری سلێمانی بۆ یانەكان و بۆ چەندان یاریزان و ڕاهێنەران ساز كرا لە هۆڵی یانەی ئاشتی.

بڕیارە سبەی پێنج شەممە تا ڕۆژی شەممەی داهاتوو لە هۆڵی میوانخانەی میهراكۆ لە سەر شاڕێی سالم لە شاری سلێمانی و هەروەها لە هۆڵی یانەی ئاشتی دووەم چالاكی یەكێتی موای تای عێراق بە سپۆنسەری ڕاستەوخۆی سەرۆكی یەكەی ئیداری شارەكە دكتۆر هەڤاڵ ئەبو بەكر بەڕێوە بچێت كە ئەویش خولێكی پێشكەوتوان و پلە بەرز كردنەوەی داوەرانە كە خۆی لە خولێكی ئارەزوومەندانەی ئازاد دەبینێتەوە كە هەموو كەسێك دەتوانێت بەشداری تیادا بكات.

سیروان مینە سەرۆكی یەكێتی موای تای سلێمانی

سیروان مینە سەرۆكی یەكێتی موای تای سلێمانی و ئەندامی یەكێتی موای تای عێراق و بەڕێوەبەری خولەكە تایبەت بە Politic Sport ی ڕاگەیاند: (بە خۆشحاڵییەوە شارە حەیاتەكەی سلێمانی دووەم چالاكی ئەمساڵی موای تای لە ئامێز دەگرێت لە چوار چێوەی ئەو 3 چالاكییەی كە بڕیار دراوە لە لایەن یەكێتی موای تای عێراقەوە).

مینە ئەوەشی ئاشكرا كرد كە: (دكتۆر هەڤاڵ ئەبو بەكر پارێزگاری سلێمانی هەستێكی جوانی لای ئێمە دروست كرد بەو هەموو پەرۆشییەی بۆ چالاكییەكان و بۆ خزمەتی وەرزش پیشانی داو سپۆنسەری خولەكەشی كرد ئەمەش گەواهیدەری ئەوەیە كە شارەكەمان لە پایتەختی ڕۆشنبیرییەوە دەكرێت هەنگاویش بەرەو شاری پایتەختی وەرزشیش هەڵبهێنێت و پارێزگاریشمان پێشڕەوێك دەبێت لەو ڕێگەیەدا كە وەرزشیش جارێكی تر ببێتەوە ناسنامەی شاری سلێمانی).

بەڕێوەبەری خولەكە وتیشی: (هەر یەك لە بەڕێزان حەیدەر عەبدول واحد البهادلی سەرۆكی لیژنە و هەردوو بەڕێزان حەیدەر حەمید و مەحمود هاشم دوو داوەری خولەكەمان دەبن و بەندەش وەك سیروان مینە بەڕێوەبەری خولەكە كاروبارەكان ڕێك دەخەم لە ماوەی 3 ڕۆژانی بەڕێوەچوونی خولەكە كە خولێكی ئازادە هەر كەس بیەوێت دەتوانێت بەشداری بكات).

جێی باس كردنە لە مانگی ڕابردوو یەكێتی موای تای عێراق لە شاری سلێمانی خولێكی كردەوە و ئەم مانگەش خولێك و مانگی داهاتووش خولێكی تر بەڕێوە دەچێت لە شاری سلێمانی كە بە هەمان شێوە یەكێتی موای تای عێراق دەبێت.

دانەر ئەسڵان

پەخشی راستەوخۆی رادیۆ پۆلەتیک