كاتێك خیانەت و ناپاكی لەفەرهەنگی گروپێك یان تاقم و دەستەیەك یاخود پارتێكی سیاسیدا دەبێتە كلتوور و بە لق و پۆپ و رەگ و بنەچەیدا بڵاودەبێتەوە، ئیدی هیچ پاڵنەرێكی نەتەوەیی و نیشتمانی نامێنیت، كە بەربەست بێت لەبەردەم ناپاكی و خاكفرۆشی و چاوساغی و پەلەكێشكرنی هێزی بێگانە، سەرەڕای ئەوەش راگەیاندن و دەزگا چەواشەكارەكانیان پارەی نەوت و سامانی وڵات دەخەنە خزمەتی پەردەپۆش كردن و شاردنەوەی راستیەكان و بەشانازییەوە لەشاشەكانەوە باس لەشەڕی براكوژی و دیل كوشتن و رشتنی خوێنی شوڕشگێڕ و قارەمانەكانی نیشتمان ئەكەن و قەتماغەی برینەكان هەڵئەكەنن و خوێ لەبرینی كەس و كاری شەهیدان و تێكۆشەرانی ئەم وڵاتە دەكەن.
ئەگەر تەماشای رۆژمێری رووداوە سیاسیەكانی كوردستان بكەین بەدرێژایی پەنجا ساڵی رابردوو لەپاڵ دەیان داستان و قارەمانێتی و تێكۆشانی گەورەدا و لەگەڵ چەندین مەرگەسات و تراژیدیای وەكو (ئەنفال و كیماباران و كۆرەو، هتد…) ئەوا وێنەگەلێكیش دەبینین، كە شایەنی وەبیرهێنانەوەو تەماشاكردن نین و ئەوەندە شەرمهێنەرن نموونەیان كەم و دەگمەنە لەهەموو دنیادا.
بەداخەوە بەتایبەتی لە دوای خیانەتی ئاشبەتاڵ و هەرەسی شۆڕش، زنجیرەیەكی درێژ لەخیانەتی گەورە لەلایەن هێزێكی سیاسییەوە ئەنجامدراون، هەر لەكارەساتی هەكارییەوە تا دەگاتە شەڕی براكوژی و خیانەتی “31”ی ئاب و هێنانی زرێپۆش و هێزی رژێمی دیكتاتۆری بەعس بۆ نێو حەرەمی پەرلەمانی كوردستان و دواتر رادەستكردنی شەنگال و داخستنی سنوور لە پارچەكانی تری كوردستان و لێدانی خەندەق و پێشڕەوایەتی كردنی هێزی بێگانە بۆ نیو خاكی كوردستان و دژایەتی هێزە خەباتگێڕەكانی هەرچوار پارچەی كوردستان ئەوە بە روونی دیدگاو ئەدەبیاتی ئەوانەمان بۆ دەردەخات كە بە شیعاری قەبەو موزەیەفی نیشتمانییەوە چ كارەساتێكیان بەسەر گەلەكەماندا هێناوە.
ئەو خیانەتانەش سەلماندوویەتی، كە لەوەتەی خەباتی سیاسی و جوڵانەوەی شۆڕشی كوردی لەپێناو ئامانجی رەوای نەتەوەییماندا دروست بووە بۆداكۆكی لە گەلێكی بەش بەشكراوی دەستی بێگانە، هەمیشە ئەو پارتە سیاسییە بۆ لەباربردنی ئەو ئامانجە رەوایە و بەرهەڵستكاری مافی گەلەكەی ئەوەی پێی كرابێت لەخیانەت و ناپاكی سڵی لەهیچ نەكردووەتەوە و چۆن بۆی كرابێت بێ گوێدانە هیچ مۆڕاڵ و بەهایەكی مرۆڤایەتی و ئەخلاقێكی نیشتمانی بووەتە چاوساغ و كەواسووری بەر لەشەكری بێگانە بۆ لەناوبردنی قەزیەی میللەتەكەی، ئەم فۆرمەش لەفیكری رەشی سیاسی ئەوەمان پێ دەڵێت كاتێك خیانەت وەكوو تیۆر و پراكتیك و فەلسەفەیش دەبێتە كلتور لەنێو فەرهەنگی هەر پارتێكی سیاسیدا ئەوە بێگومان دەبێت تەنها چاوەڕوانی كارەساتی وای لێبكرێت.
ئێستاش دوای تێپەڕبوونی زیاتر لە چارەكە سەدەیەك بەسەر خیانەتی (31)ی ئابدا، هێشتا كاریگەرییە نەرێنییەكانی لەگۆڕەپانی سیاسی و كۆمەڵایەتی كوردستاندا بەجێماوەو تاكو ئێستاش بكەرانی ئەو رووداوە بەهەمان نەفەس كاردەكەن و ئاگری شەڕی براكوژی و دووئیدارەیی خۆش دەكەن، كە دەبێت چیتر ڕێگەیان پێ نەدرێت بەری ڕەنجی خەڵكی كوردستان و شەهیدان و تێكۆشەرانی ئەم نیشتمانە بخەنە بەردەم ئەگەرەكانی لێكترازان و شەڕی ناوخۆ و ئاشبەتالێكی تر.
لەكۆتایشدا دەڵێن رێگە چارەی رێگریكردن لە دووبارە بوونەوەی ئەم كارەسات و رووداوە دزێوانە لەرێگەی بەدامەزراوەیی كردنی دام و دەزگاو موئەسەساتەكانی كوردستان و هەبوونی دەستورو دادگاو هێزی نیشتمانییەوە دەبێت، كە ئەوەش ئەقڵیەتی دەوڵەتداری و میتۆدی نیشتمانی و بیری پاكی كوردایەتی و هیمەت و بازووی دڵسۆزەكانی خاك و وڵاتی دەوێت، چونكە ئەم ئەم هەرێمە بچوكەو ئەم دەستكەوتە كەمەی خەڵكی باشووری كوردستان بەدەستی هێناوە بەرهەمی رەنج و خوێن و ئازاری سەد ساڵی میللەتێكە، حەیفە قەدەرو چارەنوسی لەدەستی كەسانێك بێت، كە ئیفتیخار بە خیانەت و نۆكەرایەتی بۆ بێگانە بكەن و بەدەستكەوت و شانازی گەورە لەقەڵەمی بدەن.
مقداد شێخ بەهادین
قەیوان گروپ
مایۆرکا سیتی جوانییەک لە دڵی سروشتدا
