زیاتر لە یەك ملیۆن كەس بۆ ئەنجامدانی حەج گەشتوونەتە سعوودیە

پۆڵەتیك پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

وەزارەتی حەج و عومرەی سعوودیە بڵاویكردەوە، زیاتر لە یەك ملیۆن كەس لە دەرەوەی وڵاتەكەوە بەمەبەستی ئەنجامدانی فەریزەی حەج روویان لەو وڵاتەكردووە.

محەمەد بێجاوی راوێژكاری كاروباری سەردان لە وەزارەتی حەج و عومرەی سعوودیە، بە كەناڵی تەلەڤیزیۆنی ئیخبارییەی ئەو وڵاتەی راگەیاندووە، وەزارەتەكەیان بە هەموو توانا و كارمەندەكانییەوە كاردەكات بۆ خزمەتكردنی ئەو كەسانەی بەمەبەستی ئەنجامدانی فەریزەی حەج روو لە سعوودیە دەكەن.

ئاماژەی بەوەشكردووە، سەرجەم توانا ماددیی، تەكنەلۆجی و مەدەنییەكان خراونەتە گەڕ، بۆ ئەوەی باشترین خزمەتگوزاری پێشكەش بەو كەسانە بكەن كە بۆ حەج دێنە سعوودیە.

جەختی لەوەشكردووەتەوە،‌ هەموو دەروازە سنوورییەكان بۆ پێشوازییكردن لە حاجییان كراوەن و زۆرترین ئامادەكاریی كراوە تاكو كارەكانی هاتنەژوورەوەی ئەو كەسانەی بەمەبەستی ئەنجامدانی فەریزەی حەج روو لە سعوودیە دەكەن، بە زووترین كات رابپەڕێندرێت.

هێمای بەوشەكرد، كە سەرجەم فڕۆكەخانەكانی مەدینە و مەككە بە هەموو توانایانەوە كاردەكەن بۆ دڵنیابوون لەوەی پرۆسەكان بەسەلامەتی بەڕێوەدەچن و جەختی لەوەكردەوە زیاتر لە یەك ملیۆن كەس لە دەرەوەی سعوودیە بەمەبەستی ئەنجامدانی فەریزەی حەج روویان لە سعوودیە كردووە.