پۆڵەتیك پرێس
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
بافڵ جەلال تاڵەبانی سەرۆكی یەكێتی نیشتمانی كوردستان بە بۆنەی سەری ساڵی كوردی و جەژنی نەورۆزەوە پەیامێكی بڵاوكردەوە و رایگەیاند: رایدەگەیەنین كە یەكێتیی نیشتمانیی كوردستان پەرۆشی گەشەپێدانی پەیوەندییەكان و فراوانكردنی هەماهەنگییەكانە لەگەڵ هەموو لایەنە سیاسییەكان. پێشوازی لە هەر هەوڵ و دەستپێشخەرییەك دەكەین كە خزمەت بە گەلەكەمان و خەڵكە خۆڕاگرەكەمان بكات.
دەقی پەیامەكە:
هاونیشتمانیانی خۆشەویست لە سەرتاسەری كوردستان
بەبۆنەی سەری ساڵی نوێی كوردی و جەژنی نەورۆزەوە، لە قووڵایی دڵمەوە پیرۆزباییتان لێدەكەم و هیوادارم رۆژانی جەژن لە دڵخۆشی و كامەرانیدا بەسەربەرن.
هیوادارم جەژنی نەورۆز ببێتە مایەی خێر و خۆشی بۆ گەلەكەمان و هەوێنێك بێت بۆ قووڵكردنەوەی گیانی خۆشەویستی و تەبایی لەنێوانماندا. هەموومان بە رۆحێكی كوردانە و لەپێناو سەربەرزی و سەرفرازیی كوردستاندا كاربكەین و داهاتوویەكی سەقامگیر بۆ خەڵكەكەمان دەستەبەر بكەین.
لەگەڵ دەستپێكی ساڵی نوێی كوردی و بڵێسەی ئاگری نەورۆزدا، رایدەگەیەنین كە یەكێتیی نیشتمانیی كوردستان پەرۆشی گەشەپێدانی پەیوەندییەكان و فراوانكردنی هەماهەنگییەكانە لەگەڵ هەموو لایەنە سیاسییەكان. پێشوازی لە هەر هەوڵ و دەستپێشخەرییەك دەكەین كە خزمەت بە گەلەكەمان و خەڵكە خۆڕاگرەكەمان بكات. ئێستا و هەمووكاتێك ئامادەی دیالۆگی نیشتمانی و بونیادنەرانەین و لە بەرامبەر ئەم ئەركە نەتەوەیی و مێژووییەی لەسەر شانمانە بەرپرسیار دەبین.
باوەڕی پتەو و نەگۆڕمان بە یەكگرتوویی هەیە، چونكە تەنیا لەو ڕێگەیەوە دەتوانین مافە رەواكانی گەلی كورد بەدەستبهێنین و داهاتوویەكی پرشنگدار بونیادبنێین.
ئەمڕۆش كە هاوكاتە لەگەڵ ساڵیادی رزگاركردن و راپەڕینی كەركووكی خۆشەویستمان، بە دڵ پیرۆزبایی لە كەركوك و كەركوكییە سەربەرزەكان دەكەم و دڵنیایان دەكەمەوە یەكێتیی نیشتمانیی كوردستان ئەو هێزە دەبێت بۆ هەمیشە لەگەڵیان دەمێنێتەوە و بە خوێنی خۆمان قودسی كوردستان دەپارێزین.
دووبارە جەژنتان پیرۆزبێت و سەرفرازبن
بافڵ جەلال تاڵەبانی
سەرۆكی یەكێتیی نیشتمانیی كوردستان