کرماشان تامازرۆی دەنگ و شێعرە

– ئەم بابەتە بە کوردی خواریین نووسراوە

نۊسینی: شاعیر و نۊسەر، ئارمین چالاک

کرماشان ئیمە گلاراویە! گلاراویک ئەڕا گوڕان، گوڕانیک ئەڕا هەڵگەردیان، هەڵگەردیانی مەیلەو بنەڕەت و بنچینەی خوەی.
بایەد بپرسیم: ئەی وەڵات ڕەنگاوڕەنگە، کە لە درێژای مێژوو پڕ بیە لە هەست شاعیرانە و دەنگ عارفانە،
ئەڕا ئیمڕۆ پڕ لە دۊزەمەس؟

مەگەر لە هۊر دیریم شیعر و دەنگ ئەی وڵاتە چووڵ بکەید؟!

پەلامار هەمەلایەنەی نۆپەرەستی و هەڵدڕین ناسنامە کوونە بنەڕەتییەگان، لە سەردەمی کە ئەڕا ئایەم؛ چە ژن چە پیای، مناڵ و پیر… ڕەژیان لە کومەڵگا تەنیا لە خوەد نۆ نیشان دانە یا وە قسەی گەل: [باکڵاسبۊن یا مودێرنبۊنە، هەرکەس بتواید شێواز یا هۊر پێشینیان زێنگەو بکەید نەتەنیا کومەڵگای کرماشان بەڵکوو گەورە کومەڵگاکان، کە کرماشان خوەی وەلیانەو هاوماڵیکەر زانی وەدۊا کەفتی ناۆ لەلی بەن…
یە لە حاڵیکە، وەشایەتی پرسکاریەیل هەر ئەی گەورە کومەڵگایەیلە وەل گیژەڵەیل زیاتر و قۊل تریگ ڕۊوەڕۊن…

بارودۆخ کرماشان جیاوازتریشە، نە تەنیا پاڵپشتی دارایی لە کرماشان کەمترە، زانست بەرپرسەیلیش لە بارەی فرە ها خوار؛ کە هەر ئەیە ڕێگای چارەی وەل دەسەڵاتیک لۊتکەیی تەمام کوور کردیە.
هەر وەیجوور کە زوان یانەی بۊنمانە (وجوود)، لە هۊر بردیمەد کە دی نیەتوانیم خەیاڵ و فکر و هەستمان نزیک وە چشتی کە لە ڕاسی هەس بخەیمە دەێشت. هەر وەی خاترە ئێمە منیەیمە کەسیگ زوان دیری، توانی قسە بکەی؛ وەلی هەرچی هۊشی وەڕاسی ئەوەیکە نییە کە لە قۊلای دڵ و فکری تیەید! لە زوان کوردی گلاراو ئەڕا کەسیگ یا چشتی وەکار چوود کە یا؛
چشتی گووم کردیە، یا لە کەسیگ یا چشتیگ دۊر کەفتیە یا لە شوونیگ بڕیایەیە!

وەی خاترە بتوایم هەر تیماریگ جیا لە هەڵگەردیان خود کرماشانییەیل وە ئەوسایان دیاری بکەیم وجاخ ڕوشنەوکەر نییەو تەنیا خوەمان خەڵەتانیمە! کەسیگ گلاراویە بایەد دەس لە حاڵ ئێسەی هەڵبگری و هەڵگەردیەیدە شوونەیل ئەوسای یا وە قەوڵ کوردیی:
«شوونبەری» خوەی بکەید، جواو ئەی گلاراوە لە ئەوساس… کەسیگ گلاراویە ناتیەی شوون ئێسەی خوەی گووم بکەی، یا دەس لە ئێسەو لەیەودۊای خوەی بکێشی! چوود لە بنەڕەتەیل خوەی، لە ئەوسای؛ حاڵ ئێمڕوژی دۊنی. ئەوجار خاستر زانی چە داشتیە و لە چە دۊر بیەو لە چە بڕیاس… بۊن ئێسەی خوەی لە بان بنەواییگ فام کەید کە ناسیدەی، لە خوەی زانیدەی، هاوجنسییە و وەپی شانازی کەید، لەی دونیای ئێمڕۆژە کە بنیایەم لە گوزەر سات گووم بیەو وە دەسکریایەگان لە کییس چیە، دی خوەی گووم نیەکەید.

ئەڕا یەسە کە دووارە دەنگ و شیعر باڵەیل هەڵفڕین لە جهان سەرحەددار چشت و سات؛ تیەنە یارمەتیدان ئێمەی کرماشانیی…

فۆتۆ: بۆتان گەرمیانیی