پۆڵەتیك پرێس
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
قوباد تاڵەبانی جێگری سەرۆکی حکومەت رایگەیاند: یەكێك لە ئەولەویاتی كارەكانم؛ بەهێز كردنی كەرتی تایبەت و رەخساندنی هەلی كاری زیاترە كە تێیدا ماف و ئیمتیازاتی كرێكار لە دەرەوەی كەرتی حكومی پارێزراوبێت.
وتیشی: خۆشحاڵم دوێنێ پەرلەمانی كوردستان، بەسوپاسەوە، یاسای كاری پەسەند كرد. ئەم یاسا گرنگە بە هەوڵی وەزارەتەكانی كارو پلاندانان و راوێژكارەكانمان لەئەنجومەنی وەزیران و بەهاوكاری رێكخراوی جیهانی كار، توانرا ئامادەسازی بۆ دەرچواندنی بكرێت.
ئەوەشی خستەڕوو، یاساكە پشتبەست بە پێوەرە نێودەوڵەتییەكان داڕێژراوە و بنەماكانی مافی مرۆڤ و یەكسانی و هاوسەنگی تێدا پارێزراوە.
رونیشیكردەوە، كاتێك دەبینم یاسایەك هەیە پەیوەندی كرێكار و خاوەن كار رێكدەخاتەوە، ماف و سەلامەتی كرێكاری ناوخۆیی و بیانیش دەپارێزێت، هەلی كاری زیاتر دەڕەخسێنێت، كاتەكانی كاركردن دیاری دەكات و مافی مناڵ و ژن دەپارێزێت، ئەوە بۆ من مایەی شانازییە.
لە كۆتاییدا دەڵێت، پیرۆزە لە كرێكارانی كوردستان و دەستی ماندووبوونیان دەگوشم، ئیتر كاتی ئەوە هاتووە ئەوانیش مافەكانی دواڕۆژیان پارێزراو بێت.