گرنگترین ڤیتامینەکان بۆ تەندروستی پێست

پۆڵەتیک پرێس

فەرامۆش نەکردنی تەندروستی پێست زۆر گرنگە بۆ ڕێگریکردن لە دروستبوونی کێشەکانی و تێکچوونی پێست، ڤیتامینەکان بە پێکهاتەیەکی سەرەکی بۆ تەندروستبوونی پێست دادەنرێن.

پزیشک هانی نازر پسپۆڕی نەخۆشییەکانی پێست لە میسر دەڵێت، توێژینەوە نوێیەکان سەلماندویانە ڤیتامینەکان بەتایبەتی ڤیتامین سی و ئی گرنگییەکی زۆریان بۆ تەندروستی پێست هەیە، ڤیتامین سی ڕۆڵێکی گرنگی لە بەرهەمهێنانی کۆلاجیندا هەیە کە بەرپرسە لە ڕەونەقی پێست و ڕێگریکردن لە دروستبوونی چرچولۆچی پێست، ئەم ڤیتامینەش بەڕێژەیەکی زۆر لە پرتەقاڵ، لیمۆ، تەماتە، بیبەری ڕەنگاوڕەنگدا هەیە.

ڕوونیشکردەوە هەبوونی ڤیتامین ئی لەگەڵ ڤیتامین سیدا زۆر گرنگە بۆ پارێزگاریکردن لە تەندروستی پێست و بەڕێژەیەکی زۆر لە سەوزەواتەکانی وەک سپێناخ، برۆکلی، جەرجیر و کاهوودا هەیە، جەختیشی کردەوە خواردنەوەی ڕێژەیەکی زۆر لە ئاو زۆر گرنگە بۆ تەندروستی پێست، بەپێی کۆنسلتۆی پزیشکی.