وەزارەتی دارایی: ساڵی ٢٠٢٢ نزیکەی ٥٢ ملیار دیناری قەرز گەڕاوەتەوە بۆ خەزێنەی گشتی

لە راگەیەنراوێکدا وەزارەتى دارایی رایگەیاند، وەزارەتی دارایی؛ ڕێکارەکان بۆ وەرگرتنەوەی قەرزی ئاسانکاری لەوەبەرهێن و بازرگانان بەردەوامە.

دەشڵێت، لەچوارچێوەی بەرنامەی چاکسازی حکومەتی هەرێم و هەوڵەکانی وەزارەتی دارایی و ئابوری بۆ زیاد کردنی داهات، ڕێکارە یاساییەکان بۆ تەملیک کرنی ئەو موڵکانە بەردەوامە کە لە لایەن بازرگانان و وەبەرهێنەران لەکاتی وەرگرتنی قەرزی ئاسانکاری لە ڕێی بانکەکانەوە وەک بارمتە دانراوە.

ئەوەش خراوەتەڕوو، بەپێی ئاماری بەڕێوبەرایەتی گشتی بانکە بازرگانیەکانی هەرێم بڕی ئەو قەرزەی لای بازرگان و وەبەرهێنەرانە ٣٧٥،٤٤٤،١٨٩،٤٦٥ دینار بووە، بەهۆی دواکەوتنی قەرزەکەوە ٦٥٨،٠٦٣،٨٢٠،٣٣٢ دینار سودی چۆتە سەر.

هەروەها ناوبراو روونیکردەوە، لەدوای گرتنەبەری ڕێوشوێنەکانی وەزارەتی دارایی و ئابوورییەوە بڕی ١٧،٧٤٣،٩٦٧،٧٢٤ دینار بە شێوەی نەقد گەڕاوەتەوە بۆ خەزێنەی گشتی حکومەتی هەرێم و کۆی گشتی ئەو قەرزەی لای بازرگان و وەبەرهێنەران ماوە بڕەکەی بریتییە لە ١،٠١٥،٧٦٤،٠٤٢،٠٧٣ دیناری عێراقی.

هاوکات وەزارەتی دارایی روونیکردوەتەوە، لە ڕێی بانکەکانەوە دەستیان کردووە بە تەملیک کردن و فرۆشتنی ئەو موڵکانەی بەبارمتە دانراون و لەو چوارچێوەیەشدا بەبەهای ٣٤،١٥٣،٠٨٠،٠٠٠ دینار موڵکی بەبارمتە دانراو فرۆشراوەو ٧ موڵکی نوێش لە سەر بانکەکانی وەزارەتی دارایی تۆمار کراون.