دەستەی دەستپاکیی عێراق ئەمڕۆ دووشەممە رایگەیاند، دادگەی لێکۆڵینەوەی رەسافەی تایبەت بە دۆسیەکانی گەندەڵی، بە تۆمەتی دزینی حەوت ملیار دینار بڕیاریدا بانگهێشتی فەرماندەی پێشووتری پۆلیسی فیدراڵی و پێنج تۆمەتباری دیکە بکات.

دەستەکە ئاماژەى بەوەشکردوە، فەرماندەی پێشووتری پۆلیسی فیدراڵی تۆمەتبارە بەوەی بە ئەنقەست زیانی بە دارایی گشتی و بەرژەوەندی ئەو لایەنە گەیاندووە کە کاری تێدا کردووە.

هەروەها ئەوەش ڕوونکراوەتەوە، ئەو پارەیە تەرخانکراوە بۆ کەلوپەلی یەدەگ و زرێپۆشکردنی ئۆتۆمبێلی سەربازی لەلایەن یەکێک کۆمپانیاکانی بازرگانی گشتی لە ماوەی ساڵانی 2014 و 2016دا.”

 دەستەی دەستپاکی عێراق ئەوەى خستووەتەڕوو، کە فەریق جەودەت شاکر، فەرماندەی پۆلیسی فیدراڵی عێراق بووە. جەودەت شاکر لە مانگی 8ی ساڵی 2019 لە پۆستەکەی دوورخراوەتەوە.