دەستپێشخەرییەک لە بافڵ جەلال تاڵەبانییەوە بۆ پارتی

پۆڵەتیک پرێس:

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

بافڵ جەلال تاڵەبانی، سەرۆکی یەکێتی نیشتمانی کوردستان دەستپێشخەرییەک ئاراستەی پارتی دیموکراتی کوردستان دەکات و داوا دەکەن لەبارەی دیاریکردنی ڕۆژێک بۆ هەڵبژاردن هەردوولا کۆببنەوە.

لەوبارەیەوە د.ڕێواز فایەق، سەرۆکی پەرلەمانی کوردستان ڕایگەیاند، “داوامان لە کاک بافڵ و دەستەی کارگێڕی مەکتەبی سیاسی کرد کە پارتی و یەکێتی گرفتەکانیان بخەنە ئەولاوە و لەسەر هەڵبژاردن قسەبکەن و کۆببنەوە، چونکە هەڵبژاردن پەیوەندی بە حزبەکانی دیکە و خەڵکەوە هەیە نەک تەنها پارتی و یەکێتی”.

وتیشی، “لای خۆیەوە کاک بافڵ پێشنیازەکەی قبوڵ بووە و داوای لە رەفعەت عەبدوڵـڵا ئەندامی دەستەی کارگێڕی مەکتەبی سیاسی یەکێتی کردووە کە پەیوەندی بە فازڵ میرانی، بەرپرسی دەستەی کارگێڕی مەکتەبی سیاسی پارتییەوە بکات و دەستپێشخەرییەکەی پێبگەیەنێت”.

ئەوەشی خستەڕوو، رەفعەت عەبدوڵـڵا دەستبەجێ پەیوەندی بە فازڵ میرانییەوە کردووە و دەستپێشخەرییەکەی پێگەیاندووە، بەڵام فازڵ میرانی وتوویەتی وەڵامتان دەدەینەوە و تا ئێستا وەڵامی فەرمی یەکێتیان نەداوەتەوە.

د.ڕێواز فایەق جەختی لەوەش کردەوە، یەکێتی نیشتمانی کوردستان ئامادەیە بۆ دیاریکردنی ڕۆژێک بۆ هەڵبژاردن لەگەڵ پارتی دیموکراتی کوردستان کۆببێتەوە.