ئێران لە شەش مانگی رابردوودا چوار بەندکراوی سیاسی کوردی لە سێدارە داوە

 

پۆڵەتیک پرێس

بەگوێرەی ئامارێکی رێکخراوی مافی مرۆڤی هەنگاو، لە شەش مانگی رابردوودا ٣٤ هاوڵاتی کورد لە بەندیخانەکانی ئێراندا لەسێدراون، کە چوار کەسیان بەندکراوی سیاسی بوون و دوو کەسیشیان لەکاتی ئەنجامدانی تاواندا تەمەنیان لەخوار ١٨ ساڵەوە بووە.

رێکخراوی مافی مرۆڤی هەنگاو بڵاویکردەوە: لەماوەی شەش مانگی رابردوودا، سزای لە سێدارەدانی لانیکەم ٣٤ بەندکراوی کورد لە بەندیخانەکانی ئێران و رۆژهەڵاتی کوردستان جێبەجێکراوە.

ئاماژەی بەوەشکردووە، چوار کەس لەو کەسانەی لەو ماوەیەدا لەسێدارە دراون بە ناوەکانی مستەفا سەلیمی، هیدایەت عەبدوڵڵاپوور، دیاکۆ رەسوڵزادە و سابیر شێخ عەبدوڵڵا بەندکراوی سیاسی بوون.

هەر لە ئامارەکەی ئەو رێکخراوەدا هاتووە: دوو کەسیان بە ناوەکانی ئەمیر محەمەدپور خەڵکی بۆکان و شایان سەعیدپوور کە خەڵکی سەقز بوون، لەکاتی ئەنجامی تاوان تەمەنیان لەخوار ١٨ ساڵ بووە و سزای لە سێدارەدانیان بە سەردا سەپێنراوە.

رێکخراوی مافی مرۆڤی هەنگاو باسی لەوەشکردووە، ٢٨ کەسیشیان بە تۆمەتی کوشتنی ئەنقەست ئەو سزایەیان بە سەردا سەپێنرابوو.

پەخشی راستەوخۆی رادیۆ پۆلەتیک