قوباد تاڵەبانی: نابێت ناکۆکییە سیاسییەکان رێگربن لەبەردەم ریفۆرم لە هێزەکانی پێشمەرگەدا

پۆڵەتیک پرێس:

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress 

جێگری سەرۆک وەزیرانى هەرێمی کوردستان رایگەیاند، بۆ پرۆسەی ریفۆرم و رێکخستنەوە و یەکخستنەوەی هێزەکانی پێشمەرگە دەبێت رێککەوتنێک لەنێوان لایەنە سیاسییەکاندا بکرێت کە هەم قابیلی جێبەجێکردن بێت و هەم روون و شەفاف بێت و لایەنەکان پێوەی پابەندبن.

قوباد تاڵەبانی جێگری سەرۆک وەزیران لە کۆبوونەوەی لەگەڵ وەفدێکی سەربازی هاوپەیمانان بە سەرۆکایەتی ژەنەڕاڵ ئەندروو گارنەر جێگری فەرماندەیی گشتی هێزەکانی هاوپەیمانان لە عێراق و سوریا جەختی لەسەر بەردەوامی ریفۆرم لە وەزارەتی پێشمەرگە کردەوە و رایگەیاند نابێت ناکۆکییە سیاسییەکان رێگربن لە بەردەم ریفۆرم لە هێزەکانی پێشمەرگەدا.

لە کۆبوونەوەکەدا کە لە هەولێر بەڕێوەچوو، گفتوگۆ کرا لە بارەی رەشنووسی پڕۆژەی ریفۆرم لە هێزەکانی پێشمەرگە و هەردوولا هاوڕابوون کە بۆ پرۆسەی ریفۆرم و رێکخستنەوە و یەکخستنەوەی هێزەکانی پێشمەرگە دەبێت رێککەوتنێک لەنێوان لایەنە سیاسییەکاندا بکرێت کە هەم قابیلی جێبەجێکردن بێت و هەم روون و شەفاف بێت و لایەنەکان پێوەی پابەندبن.

جێگری سەرۆک وەزیران لە کۆبوونەوەکەدا جەختی کردەوە سەرباری هەموو ناکۆکییەکی سیاسی لەنێوان لایەنە سیاسییەکان، بەردەوام دەبن لە پرۆسەی ریفۆرم و بە دامەزراوەیی کردنی زیاتری هێزەکانی پێشمەرگە و راشیگەیاند نابێت ناکۆکییەکان رێگربن لە بەردەم پرۆسەی ریفۆرمدا.

وەفدی هاوپەیمانان ستایشی هەڵوێستی قوباد تاڵەبانییان کرد کە بەردەوام پشتگیری لە چاکسازییەکانی وەزارەتی پێشمەرگە کردوە و جەختیشیان کردەوە کە دەبێت دەسەڵاتی زیاتر بدرێت بە وەزارەتی پێشمەرگە بۆ ئەوەی هەنگاوەکانی چاکسازی خێراتر و باشتر بەرەوپێش بچن.

قەیوان گروپ

 


مایۆرکا سیتی جوانییەک لە دڵی سروشتدا