سەرۆكی فەڕەنسا رایگەیاند، هەوڵەكانی ئەمەریكا بۆ دووبارە سەپاندنەوەی سزاكانی نەتەوەیەكگرتووەكان بەسەر ئێراندا رەتدەكەنەوە.
ئیمانوێل ماكرۆن سەرۆكی فەڕەنسا رایگەیاند، فشارە زۆرەكانی ئەمەریكا بۆ سەر ئێران تا ئێستا شكستیان هێناوە، وتیشی: هەوڵەكانی ئەمەریكا بۆ دووبارە سەپاندنەوەی سزاكانی نەتەوەیەكگرتووەكان بەسەر ئێراندا رەتدەكەینەوە، بەهۆی كشانەوەی ئەمەریكاوە لە ڕێكەوتنە ناوەكییەكەی ساڵی ٢٠١٥دا.
ئەوەشی خستووەتەڕوو، ستراتیژییەتی سەپاندنی توندترین فشار ماوەی چەند ساڵێكە بەردەوامە و ناتوانێت لەم قۆناغەدا رەفتارە خراپەكانی ئێران لە ناوچەكەدا رابگرێت یان گرەنتی ئەوە بدات ئێران نەبێتە خاوەنی چەكی ناوەكی.
ماكرۆن وتیشی: لەبەرئەوەی فەڕەنسا و ئەڵمانیا و بەریتانیا بەردەوام دەبن لە داواكانیان بۆ جێبەجێكردنی رێككەوتنەكەی ڤیەننای ساڵی ٢٠١٥، ئەگەر نا ئەوا هیچ پێشێلكارییەك لە ئێران قبوڵ ناكەین.
لەماوەی رابردوودا، بەریتانیا و فەڕەنسا و ئەڵمانیا وەك سێ وڵاتی ئەوروپی بەشدار لە رێككەوتنی ئەتۆمی دژایەتی خۆیان بۆ هەوڵەكانی ئەمریكا لە پێناو سەرلەنوێ سەپاندنەوەی سزا نێودەوڵەتییەكان بەسەر تاراندا دەربڕی.