پۆلیسی هەولێر دوو کەس بەتۆمەتی دزی دەستگیردەکات

پۆڵەتیک پرێس:

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

بەڕێوەبەرایەتی پۆلیسی پارێزگای هەولێر ئەمڕۆ پێنجشەممە دوو کەسی بە تۆمەتی دزی دەستگیرکرد کە هەستاون بە دزینی چەند بتڵە غازێک و دزیکردن لە چەند مارکێتێک.

لەوبارەیەوە هۆگر عەزیز، وتەبێژی پۆلیسی هەولێر لە کۆنگرەیەکی ڕۆژنامەوانیدا ڕایگەیاند، هێزەکانمان توانیان دوو تاوانبار بە ناوەکانی (م. م. ع) تەمەن 28 ساڵ و (ک. ب. أ) تەمەن 22 ساڵ دەستگیربکەن.

وتیشی، هەردوو تۆمەتبار دوای دەستگیرکردنیان دانیان بە تاوانەکانیاندا نا کە لە شەش تاوانی جیادا بەنزیکەیی 50 بتڵ غازیان دزیبوو و لە شەش مارکێتیش تاوانی دزییان ئەنجامدابوو، هەروەها چەندین تاوانی تریان لە باخ و کێڵگەکانی شەقڵاوە ئەنجامدابوو.

باسی لەوەشکرد، لە ئێستادا پەڕاوی لێکۆڵینەوە ڕەوانەی دادوەری لێکۆڵینەوەی هەولێر کراوە و بڕیاریداوە بەپێی ماددەی 443 لە یاسای سزادانی عێراقی دوو تۆمەتبارەکە بەندبکرێن.