یاداشتی لێتێگەیشتن لە نێوان وەزارەتی پێشمەرگە و وەزارەتی بەرگری ئەمریكا واژۆكرا

پۆڵەتیك پرێس

لەتێلیگرام یەکەم کەسیت هەواڵەکانت پێدەگات جۆینبە https://t.me/Politicpress

یاداشتێكی لێكتێگەیشتن لەنێوان وەزارەتی بەرگریی ئەمریكا لەگەڵ وەزارەتی پێشمەرگە واژۆكرا و سەرۆكی هەرێمی كوردستان جەختی لە پابەندیی هەرێمی كوردستان بە ‏هاوبەشیەتی لەگەڵ ئەمریكا كردەوە‌.

رۆژی چوارشەممە 21-09-2022، لە رێوڕەسمێكدا بە سەرپەرشتیی ‏نێچیرڤان بارزانی، سەرۆكی هەرێمی كوردستان و بە ئامادەبوونی ‏مەسرور بارزانی، سەرۆكوەزیرانی هەرێمی كوردستان سێلێست واڵندەر، ‏یاریدەدەری وەزیری بەرگریی ئەمریكا بۆ كاروباری ئاسایشی نێودەوڵەتی، جێگرانی سەرۆكی هەرێمی كوردستان، جێگری سەرۆكوەزیرانی هەرێمی كوردستان، باڵیۆزی ئەمەریكا لە عێراق یاداشتێكی لێكگەیشتن لەنێوان ‏وەزارەتی پێشمەرگە و وەزارەتی بەرگریی ئەمریكادا واژۆ كرا.

لە رێوڕەسمەكەدا نێچیرڤان بارزانی، وتەیەكی پێشكەشكرد و باسی لە قارەمانێتییەكانی پێشمەرگە لە شەڕی دژی تیرۆر كرد و تیشكی خستە سەر ‏پشتگیریی ئەمریكا و هاوپەیمانان لە عێراق و هەرێمی كوردستان بۆ تێكشكاندنی ‏داعش.

سەرۆكی هەرێمی كوردستان جەختیی لە هاوكاریی و هاوئاهەنگی ‏نێوان پێشمەرگە و سوپای عێراق بۆ بەرەنگاربوونەوەی مەترسییەكانی تیرۆر كردەوە. هەروەها سوپاسی مستەفا كازمی، سەرۆكوەزیران و فەرماندەی ‏گشتیی هێزە چەكدارەكانی عێراقی كرد.

هاوكات راگەیەندراوێكی هاوبەش لەسەر نوێكردنەوەی یاداشتنامەی لێكتێگەیشتنی نێوان وەزارەتی بەرگریی ئەمریكا و وەزارەتی پێشمەرگە بڵاوكرایەوە كە بۆ یەكەمجار لە ساڵی 2016 واژۆ كراوە. لە راگەیەندراوەكەدا ئاماژە بەوە كراوە، لێكتێگەیشتنەكە رەنگدانەوەی هاوئاهەنگی دوورمەودای نێوان ویلایەتە یەكگرتووەكان و خەڵكی هەرێمی كوردستانی عێراق و هەروەها پابەندیی هاوبەشیشیانە بۆ تێكشكاندنی یەكجارەكی داعش.