وەزیری ئاوەدانكردنەوە روونكردنەوە لەبارەی دروستكردنی تونێلی دووەمی دەربەندیخان دەدات

پۆڵەتیك پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

دوای مانگێك لە دەستبەكاركردنەوە لە پرۆژەی دوو سایدكردنی ڕێگای كەلار_دەربەندیخان، وەزیری ئاوەدانكردنەوەی حكومەتی هەرێم سەردانی پرۆژەكەی كرد و ڕایگەیاند، پارەی كاش لە ‌بانكدا نییە بۆیە 65 ملیارەكە بۆ كۆمپانیای جێبەجێكار خەرج نەكراوە، لەبارەی تونێلی دەربەندیخانیشەوە دەڵێت: تونێلی دووەمی دەربەندیخان بەقەرزی درێژخایەن دروست دەكەین.

رۆژی یەكشەممە 9_11_2022، دانا عەبدولكەریم، وەزیری ئاوەدانكردنەوە و نیشتەجێكردنی حكومەتی هەرێمی كوردستان سەردانی پرۆژەی دوو سایدكردنی ڕێگای نێوان كەلار-دەربەندیخانی كرد و لە گوندی سەید مەحمودی سەر بە شارەدێی پێباز كۆنگرەیەكی ڕۆژنامەنووسیی ئەنجامدا.

وەزیری ئاوەدانكردنەوە ڕایگەیاند: چەند بڕگەیەك لە پرۆژەكە كاری تێداكراوە، بەتایبەت قیرتاوكردن لە دوو سایدی نێوان كەلار بۆ باوەنوور، هیوادارین بتوانین ئەم پرۆژە بەردوامیی پێ بدەین و وەستانی تێدا ڕوونەدات.

لەبارەی هۆكاری خەرجنەكردنی پارە بۆ پرۆژەكەش، وەزیری ئاوەدانكردنەوە دەڵێت: گرفتی سەرەكیی پەیوەندی بە پارەی كاشەوە هەیە، چونكە پارەی كاش لە ‌بانكەكان نییە، ڕاستە ئەنجومەنی وەزیران ڕەزامەندیی پیشانداوە بە دابینكردنی 65 ملیار دینار بۆ تەواوكردنی پروژەكە، بەڵام گرفتەكە ئەوەیە ئەم پارەیە لە بانكدایە نییە، بۆیە وەك پێویست پارە بۆ پرۆژەكە تەرخان نەكراوە.

لەبارەی تونێلی دەربەندیخانیشەوە، دانا عەبدولكەریم وتی: ئێستا لیژنەیەك لە ئەنجومەنی وەزیران پێكهاتووە لەگەڵ وەزارەتی پلاندانان و وەزارەتی ئاوەدانكردنەوە، ئەم لیژنەیە لەگەڵ كۆمپانیایەكدا لە گفتوگۆداین بۆ دروستكردنی تۆنێلەكە، بۆ ئەوەی بگەین بە ڕێككەوتن، چونكە حكومەت پارەی لەبەردەستدا نییە، دەمانەوێت بەقەرزی درێژخایەن دروستی بكەین، ئەگەر ڕێكبكەوین ئەوا لە ئایندەیەكی نزیكدا دەست بەكاركردن دەكەین .

پەخشی راستەوخۆی رادیۆ پۆلەتیک