سێ‌ وڵاتی ئەوروپی گومانیان لە نیازی ئێران هەیە بۆ گەڕانەوە بۆ رێككەوتنی ئەتۆمی

پۆڵەتیك پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

سێ وڵاتی ئەوروپا گومانیان لە نیازی ئێران بۆ گەڕانەوە بۆ رێككەوتننامەی ئەتۆمی هەیە و هۆشداری بە تاران دەدەن لە شكستی دانوستانەكان.

بەریتانیا و ئەڵمانیا و فەڕەنسا، راگەیاندراوێكی هاوبەشیان بڵاوكردەوە و ئاماژەیان بەوكرد، پێشنیازی كۆتایی كە پێشكەشی تاران كراوە، زۆرترین نەرمی وڵاتانی ئەوروپا لەبارەی رێككەوتننامەی ئەتۆمی پیشان دەدات، بەڵام ئێران نایەوێت سوود لەو دەرفەتە دیبلۆماسییە چارەنووسسازە وەربگرێت و لەبری ئەوە بەبێ پاساو بەردەوامە لە بەرزكردنەوەی ئاستی بەرنامە ئەتۆمییەكەی.

ئاماژەیان بەوەشكرد، هەڵوێستی ئێران ئاسۆی گەڕانەوە بۆ كاركردن بە رێككەوتننامەكەی ساڵی 2015 تێك دەدات و گوومانیان لە نیازی ئەو وڵاتە بۆ گەڕاندنەوە بۆ رێككەوتننامەی ئەتۆمی هەیە.

ڕێككەوتنی ساڵی 2015 ی نێوان تاران و شەش زلهێزی نێودەوڵەتی (واشنتن، پاریس، لەندەن، مۆسكۆ، پەكین و بەرلین) ڕێگەیدا سزاكان لە دژی كۆماری ئیسلامی هەڵبگیرێت لە بەرامبەر كەمكردنەوەی چالاكییە ناوكییەكانی و زامنكردنی ئارامی بەرنامەكەی.

دواتر ئەمریكا لە ساڵی 2018 لە ژێر دەسەڵاتی دۆناڵد ترامپ، سەرۆكی پێشووی ئەمریكا پاشەكشەی كرد و بە دووبارەكردنەوەی سزاكانی سەر ئێران كە وەڵامی دایەوە بە كشانەوەی وردە وردە لە زۆربەی پابەندییەكانی.

هیواكان بۆ ئەگەری بوژاندنەوەی ڕێككەوتنەكە بە پاڵپشتی جۆ بایدن بەرز كراوەتەوە و لێدوانی سێ وڵاتە ئەوروپیەكەش ڕۆژێك دوای ئەوە دێت ئەنتۆنی بلیكن، وەزیری دەرەوەی ئەمەریكا وتی، وەڵامی ئەم دواییەی ئێران بۆ پرسی بوژاندنەوەی ڕێكەوتنی ناوكی هەنگاوێكی بەرەو دواوە بوو.